八幡屋涮涮鍋 (Closed)

咁岩有朋友就係住係油塘，就去左大本型到搵野食。凍冰冰都想去打下邊爐，就係大食代入面咁岩見到♥八幡屋涮涮鍋♥，之後就衝左入去坐低啦～環境都佈置得幾有日本既感覺，有啲櫻花既裝飾，台與台之間都好寬敞，唔怕驚撞親人。我地今次揀左日式料理+火鍋放題～咁就可以享受到打邊爐之外，仲可以食到壽司，真係一舉兩得呀！同埋佢仲好多野食可以選擇，直接係落單紙上面剔，咁就可以啦～出面都有自助BAR，自己調配醬料，仲有唔同既甜品同埋野食都係自己出去拎既。今次我地想特別少少，點左呢個「海膽龍蝦鍋底」，加多$30都有，價位都接受。見佢開始滾既時候，有唔少海膽係入面，不過湯底唔算好濃味，不過不失吧，但用黎做打邊爐都係幾好味！呢個鍋底仲會配埋澳洲和牛，半隻龍蝦，仲有海膽，但佢唔係任食架～澳洲和牛個賣相都唔錯，有少少脂肪分佈，食落去又有肉質，龍蝦再配上呢個湯底可以提升到兩者既鮮味，而且都幾大隻！當然唔少得就係呢份海膽啦～雖然佢份量唔算好多，但少食多滋味，仲有份鮮味！點左好多唔同款式既壽司，每款都好好食，而且呢到既刺身都好正，可以比美出面。同埋佢仲有燒物，質素同樣都幾好架！