爆丼屋 (Moved) New Location

好耐無食日本野啦!今日早左放工，約埋朋友行旺角，一早揀左食呢間人氣長龍店爆丼屋，主打丼飯，有好多款式種類供選擇。丼飯附送麵鼓湯，配料豐富，有齊紅、白蘿蔔片、海帶等，熱辣辣濃郁又鮮味，好足料。四重火山盛丼一上枱好震撼，份量十足既火山丼，有齊鮮松葉蟹肉、海膽、三文魚籽、拖羅蓉(赤身、甜蝦、劍魚腩、帆立貝、紋甲魷魚和三文魚籽)。鮮松葉蟹肉肉質鮮甜結實啖啖肉；海膽豐腴，口感奶滑甘甜；三文魚籽晶瑩剔透鮮美飽滿；拖羅蓉軟嫩細膩，軟綿香滑。三色海膽盛丼有齊北海道海膽、加拿大海膽同灸燒加拿大海膽，三款口感各有特色，推介北海道海膽綿密細緻，味道鮮甜，口感幼滑稠密，入口即溶。