Shahrazad Lebanese Dining Lounge & Bar

一直都好想試吓唔同嘅中東菜，今次嚟到有好多異國風情餐廳嘅中環試吓黎巴嫩菜。一入餐廳已經好有氣氛，裝潢、燈光同音樂都好有中東色彩。 Mix Cold Mezze有鷹嘴豆蓉，味道唔算太濃，有淡淡嘅香甜味；煙燻茄子蓉味道就重啲，煙燻木味濃郁；紅菜頭沙律都唔錯，冇紅菜頭嘅草青苦澀味，配水牛芝士好食。 Lebneh有自家製乳酪、蕃茄、酸椒，酸酸甜甜好開胃，加咗橄欖油增加香味。用naan蘸Lebneh、鷹嘴豆蓉同煙燻茄子蓉，好有中東風味。 Shrimp Matffie煎蝦仁跟橄欖油、檸檬汁及芫荽，蝦仁香口彈牙。 Samake Bil Tahini煎鱈魚柳配芝麻醬，魚柳好厚身，配芝麻醬濃郁唔膩口。 Kenbeh Bil Labban煎羊肉球加咗洋蔥同小麥碎，增加香味，羊肉經過醃製好濃味，加埋希臘乳酪酸酸哋，口感幼滑。