Kampoeng

Open Now

Now Closed

對印尼菜認識只有印撈的我，發現香港原來有地道高質印尼菜！朋友係銅鑼灣地膽，教我嚟糖街呢間印尼餐廳，估唔到原來在地庫，係咁大間，仲裝修得幾靚。粟米餅好大塊好多粟米，超脆口，煙煙靭靭。酥炸豆腐呢個好似平時食嘅臭豆腐，炸得幾脆口。香辣烤雞Ayam Taliwang職員提醒呢個印尼香辣烤雞超辣，怕我哋食唔到。但係我同朋友本身食得辣，聽完更加想挑戰一下！雞皮上面嘅醬料酸酸辣辣，越食越惹味！係辣得嚟好過癮！印尼醬燒魚 Ikan Bakar Kecap今餐飯最欣賞呢條魚，第一次試用印尼醬料燒嘅魚，魚皮燒得剛剛好，唔會燒得太乾。配嘅醬料好辣，但係辣得嚟好襯燒魚，十分滋味。鍾意食魚嘅我，太遲發現原來印尼醬燒魚係咁出色，仲要只係68蚊，好抵食！印尼特式炒飯炒飯粒粒分明，印尼醬油夠香，隻荷包蛋仲幾靚！椰青去唔到東南亞旅行，唯有嗌番個椰青止下旅行癮。估唔到又幾清甜，最後連椰肉都食埋。原來食印尼菜嘅性價比都幾高，2個人平均每人先百幾蚊，可以嗌倒咁多款小食同特色菜，下次嚟銅鑼灣諗唔到食咩都會再嚟，因為坐得真係幾舒服，又多位。