爆丼屋 (Moved) New Location

出咗糧，梗係要食好啲啦！今晚約咗朋友去到旺角豉油街嘅人龍店爆丼屋食個魚生飯獎勵一下自己。 餐廳丼飯嘅選擇應有盡有，不論係魚生飯，抑或係燒肉飯都任君選擇。而餐廳亦會將每日限定菜式/海鲜，用粉筆寫喺牆壁上。今日限定嘅係春香岩蠔同埋北海道海膽。經過幾番爭扎，最終選擇咗“超份量！三重大極上丼”同埋“海膽親子丼”，隨丼飯會附送麵豉湯湯嘅配料非常豐富，有蘿蔔、海帶、油揚等，鮮味又足料，肯定唔係靠用味粉開水。天氣咁熱，飲品當然少不了。 要咗山梨產桃果汁氣酒同青森產蘋果汁氣酒各一罐，酒精濃度唔高，但果味豐富而且甜甜地容易入口，非常透心涼。“超份量！三重大極上丼”除咗有八塊極上吞拿魚外，面頭有鮮甜海膽，碗邊則有滿滿松葉蟹肉，一次過可以有三重味覺享受。😊“海膽親子丼”綿滑海膽配上鮮嫩肥美三文魚，又係一個絕配；不消二十分鐘，我地已經三爬兩撥將兩個丼飯消滅，再飲埋果汁氣酒，非常滿足，認真暢快。