新肥泉海鮮大排檔

Open Now

Now Closed

今次特登帶屋企人再嚟食，皆因港式大排檔真係唔多地方可以食到，位於官涌熟食中心「新肥泉海鮮大排檔」就係好有鑊氣嗰種，完全睇到廚師炒餸嘅工架，而且交通方便，就近港鐵站、高鐵站，行幾分鐘就到。餐牌菜色選擇多，有傳統又有新穎，我哋QR code落單，話咁快鑊氣小菜就熱辣辣送到枱面。◉ 油浸游水筍殼 $188筍殼係淡水魚但無草腥味，無幼骨，呢種經典煮法嚟到大排檔一定要叫。筍殼魚落油鑊炸煮而成，完全唔肥膩，炸得皮脆肉嫩，魚肉又厚又白，鮮味得以保存，脆到連魚骨都食埋。◉ 椒鹽軟殼蟹 $148熱辣辣，脆漿夠薄身，炸得超鬆脆，唔會炸到乾晒，保持到軟殼蟹肉質感，啖啖肉，啱晒懶剝蟹殼嘅朋友。椒鹽味調得香辣惹味，好多炸蒜，承傳到避風塘嘅炒法，好有鑊氣，份量十足。◉ 肥泉小炒王 $118爆炒得好香，夠晒火喉，多款材料：韭菜花、叉燒、蝦乾、蝦仁、魷魚、銀魚仔、腰果、菜脯，入口爽脆，口感豐富，惹味鹹香，濃味之選，送粥一流，份量都幾多。◉ 炸大腸 $98切成長方形一片片，炸得皮脆香口，有油香，無太多肥膏黐住，有菠蘿墊底，蘸埋糖醋汁，食到傳統客家炸大腸嘅味道。◉ 豉椒排骨炒河 $98排骨俾得多又醃得入味，洋蔥、青紅椒、