一早訂好位, 已預留左一張二人枱給我
打開餐牌, 沙律/前菜, 熱湯, 廚社精選, 主菜到甜品一應俱全
亦有供應酒類及非酒精飲品
神秘無酒精鷄尾酒 ($58)及青檸梳打 ($45), 前者材料為莓類, 兩杯飲落酸中帶甜, 幾醒胃!
個人習慣食西餐會叫個沙律"清新"一下, 呢客凱撒沙律配煙三文魚 ($148), 以清脆多汁既沙律菜, 脆口多士粒及咸香煙三文魚而造成, 煙三文魚份量都唔少, 兩者味道都幾夾!
呢款店內精選燒牛脷熱脆飽 ($88), 一客三件, 薄燒牛脷配以芥末醬汁, 被熱脆上下包圍, 腍身牛脷配以硬脆飽, 一軟一硬雙重口感, 好味道!
另一款店內精選松露煮日本年糕 ($98), 一片片煙韌年糕被香滑松露汁所包圍, 有少少菇片作伴菜, 入口香滑軟熟, 個濃汁若然用黎配意粉/法包都相當唔錯!
餐牌上湯有三款選擇, 我地分別點左黑松露磨菇湯($68), 質感creamy帶有好香菇菌味, 亦食到菇菌蓉, 幾飽肚!
另一款為忌廉冬蔭公海鮮湯($88), 西式同泰式既混合湯, 味道偏重冬蔭公味, 有D辣度, 加埋忌廉可增加入口滑度, 海鮮料包括原隻鮑魚, 帶子, 蝦, 蟹籽等, 十分豐富!
主菜出場 : 燒美國牛肉眼配茄汁扁意粉 ($198), 選用肉眼位置, 肉質有D嚼勁但肉味偏淡; 扁意粉偏硬, 又可以演繹成有口感; 茄汁味道偏甜, 帶酸返少少會感覺好D!
食西餐點鴨脾既次數好少, 友人反而有興趣, 呢客香燒正宗法國鴨脾配鮮薯蓉 ($178)就係咁而出現係我地餐枱上, 鴨脾都唔算細隻, 外皮被燒至香口, 切出黎既肉都唔少! 我承認對呢樣食物有點偏見, 目測應該係好乾及肉嚡, 即管點少少醬汁放入口睇下會否"好味"D, 點知....................入口係竟然係嫩滑, OH.................我要向呢隻法國鴨脾SAY SORRY! 另外佢既薯蓉係用黃蕃薯整, 入口香甜幼滑, 好好味!
為左令呢餐更完滿, 點都要預留位置比甜品, 呢客藍莓芝士蛋糕份量精緻, 擺碟亦吸引, 酸中帶少甜既藍莓醬中和左芝士蛋糕既膩感!
