王將精點 (Closed)

落雨天，又凍凍地，喺油麻地地鐵站出口見到呢間可以外賣嘅點心同埋蒸飯專門店，是旦買左個梅菜排骨飯($32)丶蝦餃王($28)丶同埋椒鹽炸雞翼($24)，冇加一，加埋都係八十四蚊，價錢尚算可以。比左錢之後先知道佢係即叫即製，不過等左十五分鐘左右已經有得攞，都0k啦。話時話，等嘢期間發現原來隔離鋪位都係佢哋嘅，可以現場食，不過坐位唔多，十個位左右。講番啲嘢食都唔差，蝦餃一籠有三粒，粒粒都飽滿大粒，同埋皮夠薄。椒鹽炸雞翼有三隻，即叫即炸，熱辣辣，都幾好食。餐牌上寫住梅菜排骨飯，打開飯盒發現原來有驚喜，個飯係用荷葉一齊蒸㗎，即係荷葉梅菜排骨飯先啱，成盒飯好滿，啲梅菜唔會太咸，排骨唔會有好多肥肉嗰隻，味道都算唔錯。