同其他放題一樣，野飲牌係任拎嘅，款式都幾多，汽水啤酒果汁茶等樣樣齊。
第一ROUND緊係叫轉刺身先啦，種類唔少，都幾新鮮，尤其油甘魚同墨魚，香濃甘甜，唔錯！
海膽手卷細細份一啖食得哂，手卷結實紫菜脆，海膽夠甜，口感唔錯。
之後係法式忌廉藍青口，忌廉湯湯頭濃郁，青口新鮮，相當入味，好食！
鐵板一口牛穫氣十足，咬落爽口彈牙，配上炸蒜片點綴，牛味出哂黎，又香又濃。
牛油粟米牛油味好香，同粟米嘅甜味幾夾。
再黎係炸物。芝麻雞翼就如預期般好食，酥脆外皮加上香嫩雞肉，表現完美。
香芋丸香脆可口，芋頭涵料多得黎又夠芋香味，咬落煙軔充實，啖啖芋泥。
再黎係燒物。燒菠蘿燒至軟身，減弱左入面嘅酸澀感，味道酸甜得宜。
鹽燒雞軟骨同鹽燒牛舌落左少少鹽，激發燒物香氣，再加上清新檸檬汁作平衡，風味一流～
最後係甜品自助吧拎左幾款甜品食下。木糠布甸軟硬適中，唔會太甜；伯爵茶奶凍有濃郁茶香帶微甜，唔會令人覺得膩；焦糖燉蛋表面有一層脆皮焦糖，配埋綿滑蛋肉，味道更係同視覺一樣咁滿足。
