於是就諗住直踩入去食 點知入面滿哂 個侍應話要等半個鐘先有位
我就主動提議話留電話 有位call我 唉 為左食等下都有咩所謂既 橫掂當時都係730pm 我自己屋企平時都係800pm先開飯 唯有行住花園街先
半個鐘之後 見未有電話睇 就行返去鋪頭等食 點知入面d人好似冇郁過咁 個侍應話好快 入去坐陣先 咁我地就入去揀定食咩 其實佢有d 2人套餐丫 4人套餐都幾抵食 但我老母諗住試雨佢個咖哩羊腩配印度薄餅 個套餐入面冇既 所以決定散叫算
每人$3既茶芥俾d咩茶我呢... 哦 原來係玄米茶 都幾好飲既
餐前小吃 每人一粒蕃茄仔 好甜 應該有落糖 個碗仔仲見到有茄汁 洗唔洗用埋茄汁黎調味丫sosad
老豆夜晚一定要食飯 所以叫左個北菇蒸雞飯 嘩 依個飯不得鳥 係成餐飯最好食 一黎夠香 二黎足料
話明齋鋪 點會有雞俾你食呢 佢自然用其他野代替 咁係咩呢?! 拿 以素食黎講 離不開都係菌類 大家諗唔諗到咩菌最似雞肉呢?! ......佢用左猴頭菇黎代替 唔講得笑丫 咬落去既口感真係幾似 之後仲有木耳同其他菌做配菜 淋上醬油 將飯同菌撈埋一齊食 仲有陣陣既薑味 真係好好食
(hkd$7x)
之後黎左老母最想食既咖哩羊腩配印度薄餅 以咖哩黎講 都算夠香夠滑 撈飯一流 不過好可惜佢既羊腩係用面筋黎代替 口感唔多似 而且面筋得數粒 即刻大打折扣 浪費左d咖哩汁 而印度薄餅 你都唔多期望太高 只係非常非常普通既急凍薄餅皮熱返俾你既貨色 這個可以不試:( (hkd$6x)
我想食粥清清地 因為好耐以前食過六榕仙館既粟米粥 所以黎到食度都想叫個粟米粥黎食下 睇下可唔可以回味下 於是就叫左個玉子粟米粥...... 碗粥黎到......賣相都覺得堅麻麻:( 食落真係名符其實既
玉子.粟米.粥 全部味都係各自各 完全mix唔到埋一齊 玉子還玉既味 粟米還粟米既味 粥還粥既味 我相信佢唔係一齊煲既 只係有個粥底 有order就另外放d粟米同玉子豆腐上去:( 真係好失望丫 好彩叫左個細煲炸 (hkd$38)
食飯點都有碟菜既 所以叫左個葡汁四蔬 因為知道葡汁mix任何野都好食 所以依道菜應該最穩陣 黎到果然不出我所望 色香味有齊 佢唔止四蔬添丫 八蔬都黎緊 真係好多蔬菜 蕃茄 荷蘭豆 小唐菜 菜心 瓜 各種菌類 依個真係超抵食 又好食 (hkd$6x)
最尾當然有糖水喇 係紫米露 都還可以 有椰香味 唔會太甜 (hkd$0 餐後送糖水)
服務方面: 其實上菜執碟都快 不過埋單個陣 侍應妹妹叫左另一個侍應埋 點個個條友掛住同人傾計聽唔到 搞到要等左好幾分鐘
環境方面: 個日真係好唔好彩 撞正佢有部冷氣壞左 又好不幸地又被編左去坐冇冷氣位 佢又得個一部好細既坐地風扇 成家人都係流住汗食飯 一路食一路用tempo抹汗sosad:( 洗手間都算乾淨 又有紙巾提供
最後加一連茶芥盛惠hkd$320(四人) 抵唔抵食 好唔好食就見人見智喇 我叫四碟送 有兩碟好食 都係一半一半 五五波
