S2 鐵板燒 (Closed)

係佐敦既一個角落裡，有間高級日本鐵板燒，主打高級食材。我同女朋友見依到有個全海膽宴，就專程黎睇下。依個二人海膽杯盛宴盛惠二千，但臨近情人節，又有藉口食好D。S2既筷子可以更換木製筷子頭，乾淨衛生。北海道3點盛盒牡丹蝦又大件又爽口，加上厚切三文魚既肥美同北寄貝刺身既爽脆，配搭唔錯。蟹肉黑醋沙律杯酸酸甜甜，特別在蟹肉似經烘乾，咬落帶質感，有少少脆，同一般蒸蟹起肉既食法有所不同。師傅係燒板上將一塊又一塊既海膽煮成海膽汁，同海參一齊炒到濃稠，配搭有特色，帶濃郁香氣。十層海膽杯係S2既招招牌菜，食材包羅萬有，包括燒白鮫魚脆片、黑魚子、紫海膽、海葡萄、藍鰭吞拿拖羅、三文魚子、白蝦、松葉蟹，同埋墊底既海帶。每一層既食材都要夠新鮮，先唔影響到其他層數既味道，依個海膽杯絕對做得到。師傅又將海膽、松茸、大蝦同多士一齊放係鐵板到燒，最後混成一體。多士香脆、蝦肉鮮甜、松茸味香，再加配獨特海膽汁，回味無窮。甲羅燒底下填滿腦蟹肉同蟹膏，上面鋪了三文魚子、海葡萄、海膽同黑魚子。海膽味道突出，底下蟹膏略咸。龍蝦肉非常結實，非常鮮甜，但係龍蝦上面既海膽芝士醬對我黎講都係咸左D。A5和牛入口即溶，夾住海膽松茸，非常好食。