威靈頓牛柳 - 本人係第一次食威靈頓牛柳, 估唔到咁有驚喜! 酥皮做到酥脆嘅口感而且充滿牛油香味, 威靈頓牛柳嘅精髓在於酥皮同牛柳之間嗰一層黑松露蘑菇醬, 咁嘅價錢有呢個質素真係喜出望外😍牛柳焗到大概五成熟肉質非常軟腍, 肉嘅顏色帶點嫩紅, 熟成度掌握得恰到好處👍🏻 另外要大讚佢嘅意粉，係幼身而且彈牙嘅意粉, 一D都唔馬虎! 配埋秘製黑松露紅酒醬汁真係絕配!
我哋真係好鍾意食牛, 身為牛魔王嘅我哋決定點多一客肉眼牛扒試一試! 好鍾意佢嘅薯條舊式茶餐廳必食嘅鋸齒薯條, 上碟時熱辣辣即叫即炸! 牛扒有成兩大塊咁多, 煎到啱啱好五成熟肉質嫩滑而冇血水, 超水準之作😊 性價比極高!
另外推薦大家加錢升級做酥皮羅宋湯, 食牛扒加酥皮湯, 真係所有兒時回憶都返晒嚟!👶🏻
晚市套餐加$48就有一杯紅白餐酒, 有時想平平哋同另一半或者朋友鋸下扒, 嘆吓紅酒, 傾吓偈, 呢度係唔錯嘅選擇! 簡直係平靚正之選😌另外要特別一讚嘅喺呢度嘅服務, 侍應哥哥真係好有禮貌, 而且好主動又熱情招待客人, 係充滿人情味嘅小店, 而家香港真係越來越少了🥹
1
