元朗呢間台灣菜小店真係有驚喜！排咗十分鐘隊，一入去即嗌杯冬瓜茶解渴，甜度啱啱好，冰涼解膩，正～
必食胡椒豬肚雞腳湯米線，個湯真係堅有驚喜！飲第一啖已經飲到個甜味，唔係落味精嗰種死鹹，似係豬肚同雞腳熬出嚚嘅天然鮮甜，帶住胡椒微辣，飲完成個人順晒，湯底濃得嚟唔油膩，忍唔住飲到見底啊！豬肚爽口，雞腳腍到一啜就脫骨，米線索盡湯汁，食完成身暖笠笠！
見到隔離枱外賣炸豬扒，炸到金黃色脆卜卜，望落勁juicy，雖然今次冇叫到，但下次一定要試！
草莓麻糬真係不得了！即叫即製熱辣辣上枱，外皮煙韌到拉絲都得，咬開即刻爆出草莓香，酸甜果香同糯米皮超夾，淨係呢種流心效果已經值回票價！
邪惡之選肉鬆西多士，炸到金黃酥脆，夾住滿瀉嘅肉鬆，鹹甜交織，卡路里咩嘢嚟㗎？唔識！
芝士肉鬆蛋餅皮薄餡多，拉絲芝士夾埋鹹香肉鬆，口感豐富到呢⋯⋯
人均百零蚊食到捧住個肚走，碗湯同麻糬真心要encore，台灣風味還原度高，會再嚟！
