🍖簡單嘅一個三色丼飯，其實最唔簡單。用上最甜美嘅材料，配上最好食嘅日本米，粉紅色柔軟嘅吞拿魚蓉，金黃色香滑嘅海膽，仲有粒粒分明鮮橙色嘅三文魚子。三樣嘢真係絕配。因為材料新鮮，全部材料嘅味道都最大化，吞拿魚蓉真係好鮮甜，海膽鮮美唔會腥，魚子粒粒爆開，油份充足。總括嘅評價系顏色超級搶眼，選材一流，味道同口感互相輝映。
🍖然後點咗一個口感完全唔一樣嘅一口芝士黑豚卷。佢用炸豚肉球嘅方法處理。外面系脆口嘅炸粉，入面嘅芝士同埋豬肉因為俾熱辣辣嘅外皮包住，出嚟嘅效果特別香，而且芝士因為溫度嘅保存，仲會有拉絲嘅口感。
🍖我特別點咗一杯house sake去配搭呢兩個食物。清酒配搭海鮮當然冇得彈，但係配搭脆口嘢一樣系絕配。
係一個平日嘅中午，悠悠閒閒咁享受美味嘅日式食物，再由清酒去解放每一個細胞。真係超放鬆。
