小甜谷 (Closed)

喜歡做生意的人親力親為的態度，尤其係飲食業。幫襯小甜谷大大話話超過10次，差不多每次都見到小谷跟谷伯有御駕親征，栽花落單造甜品。最初小甜谷的服務水平確實幾MK，寸寸貢，若非朋友堅持，深信蔡瀾「有水準的食肆才會有有態度的伙記」，早就一次起兩次止。慶幸真係見到有改進，如今店員大都笑意盈盈、禮貌周周，落單時細心推介甜品，送餐時又有溫馨提示。如果食甜品見到店員黑口黑面，真係好大煞風景，幾好食都假。小甜谷的甜品賣點係自家製，材料上乘，平均廿零卅蚊一客，價錢合理。其中用北海道牛乳做成的燉蛋白、奶凍最受歡迎。個人喜歡凍燉蛋白多一點，無熱食咁甜。至於荔枝奶凍，荔枝味清香，可喜。其他仲有花旗蔘菊花愛玉（俗稱白涼粉）、楊枝甘露豆腐花，口味清甜，齒頰留香。最近見又有新猷，乃用原隻西方或菠蘿盛載的的生果冰，不過尚未親身試味，唔肯定味道如何。讚咗咁多，最想彈既係環境，小甜谷露天開揚的設計本意不俗，但舖內空間狹窄，3/4個舖面伸延至有蓬後巷，與渠口小強和二手煙同食，認真難頂。即然連人和咁難搞都搞番掂，地利呢下，係咪可以諗諗佢呢？期待中！