新翠華茶餐廳 (Moved) New Location

約了損友打邊爐再飲野，行經登龍街，忽然聞到炭爐煲飯香，立即四周望看從何處傳出，最後找到這裡。見佢一個個炭爐在燒煲仔飯，好有風味，立即call損友轉移陣地，一行三人來了這間外表普通的茶餐廳，雖然天氣還不是太涷，但難得搵到炭爐煲仔飯，所以一於先吃為快。入面人也不少，可見識食的人也不在少數。叫了窩蛋牛肉飯、潤腸滑雞飯同咸魚肉餅飯。等左幾個字，三煲飯先後上檯，個人覺得用炭爐燒煲仔飯風味寧舍不會，飯香四溢。其中仍舊最喜愛我叫的潤腸滑雞，一向也認為潤腸是煲仔飯的最佳拍檔，其次就係咸魚同田雞；配角的豉油有蒜味，幾有特色；食到最後將個例湯倒落個煲度，刮埋D飯焦來吃，大家都非常滿足。連三杯涷飲埋單150蚊左右，唔算平但值得，因為而家市面的平價煲仔飯大多用石油氣煲，佢個炭爐出來都係做樣居多，風味差好遠。用炭爐煲的除了呢度，知道的還有西環合記，所以喜歡吃煲仔飯的不能錯過。