不過呢間就好唔同，名就堅尼地，實則不知幾貼地。之前食過下Lunch，覺得幾好食，餐廳又闊落，裝修工業風得來，仲幾classic添，水泥牆上面掛住黑膠唱片／舊式海報／書架暨酒櫃咁，我自己好鍾意。
重點係服務態度係真心唔錯
，令我不其然有啲懷疑我係咪身處係香港呢個時空
。呢日收工之後同屋企人諗住咗食埋晚餐先返屋企。想搵個地方舒舒服坐低食個安樂茶飯，不其然諗起呢度啦。我哋未够7點就入坐，仲未坐滿，仲有卡位可以坐。有成17個set可以揀，連餐湯及飲品，真花多眼亂。
1
不過最後揀咗下面呢啲。
美國西冷牛扒配黑松露野菌燒（薯菜）餐湯轉酥皮湯+$28
屋企人揀嘅。塊牛扒好誇張，大到離譜，下面請睇對比圖。要求7成熟，但係完全唔會韌，牛味好濃。我切咗一塊來食，越咬越有牛味
。薯菜都爆炸豐富，有薯蓉／甘筍／西蘭花／翠玉瓜，無油無鹽，純粹水煮，好清新爽脆。
威靈頓牛柳 （薯菜）餐湯轉酥皮湯+$28牛柳相對比上面唔算大件，但係切得超厚，我係揀咗medium rare 3成熟，牛柳肉質比較軟嫩，牛味相對無西冷咁濃，加埋個酥皮好夾，都係松露野菌汁，好好食
，配上薯菜（同上）我係完全食唔晒啲配菜。
1
食到差唔多尾聲，我哋分別揀咗凍／熱去檸水，咁就perfect match啦。
總結就係，絕對滿足我安樂茶飯呢個要求有突。食物性價比高，服務真心好，當晚兩個侍應（1男1女）都服務週到，特別係個女仔。食物出品相當有誠意，晚飯1百蚊多啲食到呢個質素，真心讚。
睇到網紅店長期排長龍，呢啲真正有heart嘅餐廳反而無咩街外人知，有時都有啲心酸。如果有日俾遊客發現，連我哋都要排隊食，我覺得無所謂，仲開心添。
