天 · 悠蔬食 (Closed)

5月14日帶埋個女去荃灣荃新天地2期嘅「天·悠蔬食」，第一次去。食物比較濃味，本來以為咕嚕肉係炸猴頭菇，原來係素肉，汁太甜有點乸喉嚨。新豬肉羽衣甘籃菜魯肉飯，整體係好味嘅，菜切得太幼又得好少，食唔出咩味。杯香芋黑糖珍珠似係用杏仁奶沖（我問過員工係用咩奶嚟沖，佢話唔知幫我問吓，但跟住冇覆我），我同個女都覺得味道好膠，好難飲，飲咗幾啖就放棄咗。伯爵茶千層蛋糕好味，唔太甜，好濃伯爵茶味，我個女好鍾意，話下次要再食。南瓜藜麥沙律冇乜特別，份量很少，得幾啖。個女最鍾意係個素湯，我都覺得好好味。入口處有部扭蛋機但冇代幣俾小朋友扭，有位年輕嘅男員工話：你就咁拎份禮物走啦！（冇神冇氣地講，俾佢嚇親）。裝修好少女風，座位闊落，但冷氣超凍，我個女邊食邊震（已經叫店員熄咗對住我哋張枱嘅出風位），我都覺得好難頂，快快食完即走。