串燒堂 (Closed)

一個字：伏。如果有得比0分，我會絕對毫不猶豫地比0分。成餐飯由上菜伏到埋單如果你想體驗下咩叫圖文不符，同埋由咁多好評既期待變成滿肚火，同埋原來訂位可享全單的88折只係數字。想交下智商稅既，咁你就可以黎試下。呢份燒澳洲牛小排，雖然明白圖片只供參考。但都唔係差咁遠呀嘛，上菜見到呢碟野真係打左個突，同張相差咁鬼遠，食落仲又柴又乾，仲要收$98。另外嗌左個錫紙花甲粉，大家千祈唔好諗住係有錫紙包住花甲粉比你，實際上只係成碗米線咁上比你。味道真係好普通，有少少辣味咁。燒大大茄子，你當個'大大'係typo 就ok，隻碟裝完條茄子之後仲有空間比佢郁動下。燒蒙古羊肉串，千祈唔好比張圖呃，以為係大大串個款。實際上只係平時串照燒雞肉個款size 竹簽拮左4粒好蘇既羊肉。因為一路上菜都太谷氣，所以只影左最離譜既牛小排。埋單時，店員話比9折，唔係訂位時所講既88折。因為系統所限，只可以比9折，店員仲話全部客都係比9折。店員當然仲話bla bla bla，不過真係唔想再回憶， 所以大家自己去體驗下就知咩事。不過都有d 係正常既，就係燒韮菜同王老吉。P.S. 一路打一路回想成餐飯，係十分之折磨。