亞萊泰 (淘大商場3期) (Closed)

大家有睇開我嘅食評，都知道我好鍾意食泰菜，係呀我今日又食泰菜啦！今日去到淘大花園，見到有間叫亞萊泰嘅泰國餐廳，門口仲要貼住全日免收加一嘅告示，我就好不猶豫地衝入去食啦！食完之後，呢間餐廳比我最大嘅感覺係真係好好好抵食，因為佢價錢平，而且份量非常之足，而且味道非常唔錯，住附近嘅居民真係有福啦！我哋叫咗個二人餐，都只係$298 ，有一個好豐富嘅泰式拼盤、魚肚羹、主菜、蔬菜、甜品，係咪好抵先？飲品仲要買一送一。我哋三個人食，加$50仲有多個炒金邊粉，三個人$400就可以食飽飽，真心抵。泰式拼盤：有春卷、蟹棗、魚餅、蝦餅，樣樣都好味。香草仿蟹肉雞絲魚肚羹：雖然佢寫住係細份量，但份量依然好足，夠每人飲幾碗。而且魚肚羹好香，又好足料，真心好飲。泰式海南雞：有半隻，但你睇幾大碟！隻雞味道唔錯，肉質夠滑。馬拉盞炒通菜：幾乎每次食泰國菜必點嘅菜式，呢碟都係一流水準，炒得好香，通菜好新鮮。泰式甜品：有四款，每款甜品有一件，可以一次過食齊四款泰式甜品，唔太甜好好味。飲品方面，珍珠奶茶、龍眼冰、菠蘿冰都好飲。至於泰式鮮蝦炒金邊粉，份量好多，蝦又彈牙，味道好正宗，熱辣辣好味道。