梨滿園韓國料理 (Closed)

不嬲對韓國炸雞都好有好感，真係好鬼好食嘅嗻！！老婆今日帶我去而家食我哋食親韓國嘢都一定會嚟嘅〈梨滿園〉，佢話最近有做埋〈90分鐘任食韓式炸雞〉，聽到都即時心心眼！初初仲以為任食會好貴，但原來只係百鬆啲蚊嘅價錢，真係抵到爛！！除咗食炸雞放題之外，都仲有好多人叫返平時嘅韓燒或者韓國菜式，之前食過都覺得質素好高架！食韓國菜一定會有好豐富嘅韓式小食做前菜，樣樣都好好食，老婆轉過頭就已經食曬六碟。食炸雞又點可以冇啤酒，而家仲做緊買二送一特價，點可以唔啤啤佢。🍻五款口味嘅炸雞分別有〈芝士味〉，〈薑蔥味〉，〈秘製醬油味〉，〈甜辣味〉同〈蜜糖味〉。急不及待先試下面頭鋪滿芝士粉嘅〈芝士味〉！！滿滿嘅芝士粉為熱辣辣脆卜卜嘅炸雞更添〈芝〉味。🧀〈醬油味〉少少鹹鹹地，非常香脆可口，好惹味。平時比較少吃到韓式炸雞係有〈薑蔥味〉，但原來皮脆肉嫩嘅炸雞上面加上薑蔥絲吃又別有一番風味。食完炸雞，個肚有小小漲漲地感覺，好想飲啲辣嘅湯去解解油膩，所以就點咗〈辣泡菜湯〉入面仲有好有豆香嘅豆腐同埋腩肉片，酸酸地辣辣地，飲完即刻舒服曬。