家賀屋刺身寿司專門店

聽講灣仔有間高質日本菜，放工就約咗同事一齊食。呢度有元祖波子汽水，味道係經典波子汽水味，好難得，叫咗枝懷吓舊。主食點咗大名壽司定食，有八件壽司、一個沙律同一碗三文魚湯。魚生係店內主打，唔怪得樣樣都咁鮮。最鍾意大本鮪魚腩，好肥美，油脂感好重。海膽又係好正，好鮮甜！其他魚刺身都好爽口彈牙。意猶未盡，再點咗特選鮪盛，有三種唔同嘅拖羅。本鮪赤身就口感結實，油脂較少；中本鮪魚腩油脂分布均勻；而大本鮪魚腩油脂感好重又肥美。忍唔住再叫咗三文魚腩刺身，好肥美，入口嫩滑。熟食方面就有鹽燒油甘魚鮫，燒完都唔乾，保留到魚嘅鮮味，點埋柚子醬汁仲惹味。而薄燒牛舌肥厚適中，入口唔靭有嚼勁。關東煮湯底好濃，同日本食到嘅差唔多味。不過玉子就略為失色，味道偏甜。整體而言食物係幾高質，嚟食嘅話一定都試魚生，質素保證！