北海道食堂 (Closed)

今日同朋友去咗沙田行街，行過沙田中心，見到一間叫做北海道食堂嘅日式餐廳。都好耐冇食過壽司，於是就入咗去試試。呢度環境唔錯，比起一般嘅日式餐廳嚟得寬敞。坐落去又唔會好迫，有位放包包，真係好舒服。 睇睇個menu先，選擇都幾多，有晚飯套餐同散叫嘅冷點。我哋就叫個海葡萄豆腐野菜沙律、三文魚壽司、三文魚腩刺身、刺身丼餐同北海道牛乳華味鳥味噌鍋餐。 而野飲方面，我地就叫咗一凍一熱嘅柚子蜜。最先嚟到嘅係海葡萄豆腐野菜沙律，一般我哋比較少見到海葡萄。其實佢個口咁就好似魚子一樣，如果咪埋眼食，真係分唔到佢哋呀！呢個前菜真係好fresh，有凍豆腐同野菜十分開胃。食完前菜之後，就到我哋至愛嘅三文魚壽司同刺身。 呢款魚腩刺身啖啖肉，食一塊已經覺得相當滿足，仲有成四件咁多，真係超抵牙！最後到我哋嘅套餐呀，每個餐都有跟 一杯嘢飲同一個湯。 刺身丼餐五顏六色，有好多種料理，包括三文魚、玉子、吞拿魚和鯛魚，望落相當吸引，岩哂鐘意魚生嘅我。 另外，牛乳華味鳥味噌鍋亦相當特別，湯底係用牛乳同味噌組成。而材料亦都相當豐富及健康，有蔬菜同菌類，仲有好多豬肉添！一個人食真係超飽。食飽啦，我哋埋單啦。嘩！食咁多嘢原來先四百蚊咋