小火焰韓式咖啡廳 (Kwun Tong View) (Closed)

辛苦左成個星期，禮拜六臨做gym之前梗係搵啲好嘢食啦。咁啱女朋友又想食韓國嘢，咁就搵左呢間之前喺電視都有介紹過嘅炸雞餐廳。不得不讚嘅係個冰梅沙律，完全有意外嘅驚喜，蕃茄沾上酸酸嘅梅子味道，兩者配合得天衣無縫，完全冇違和感，鍾意食酸野嘅我哋，食到停唔到口。睇完個Menu之後，就決定叫個招牌嘅熔岩炸雞。個雞炸得香脆可口之餘，配合佢微酸嘅芝士，好能夠引起人嘅食慾，再加上芝士唔太漏，令人食多幾件都唔會有罪惡咁。喺韓國嗰時食咗個水冷麵，就好掛住，好食嘅水冷麵冰凍得來又清新，好能夠refresh食肥膩野嘅感覺。呢度嘅水冷麵做得都幾出色，尤其是我哋食咗好多炸嘢之後再食佢，感覺食多幾round熱氣嘢都仲得。年糕炸雞亦令人諗起韓國嘅味道，年糕煙煙韌韌口感一流，炸雞係韓式嘅酸辣味道，令人忍唔住食多兩舊。下次約多幾個朋友你就可以食多幾款嘢食啦。