蘭芳園

Open Now

Now Closed

因為有好多人都讚好，所以今日中午我們去中環工作完之後就特意嚟咗「蘭芳園」食午飯！點知一坐低就開始畀店員鬧，當時我們三個人被迫安排同兩個陌生人一齊坐張四人檯，當時已經覺得好擠逼，同隔離檯又背頂背，兼且畀大聲呼喝叫我們再坐埋啲，再多兩個人落嚟！嗰刻我們五個強烈反對，點可以再加多兩個人落嚟，店員完全無理會我們嘅反對，堅決加插兩個人落嚟！嗰刻真係好想走，但無奈已經點菜！我們仲要忍受店員高舉熱湯同凍飲，不斷喺你身後撞嚟撞去，真係驚險萬分！七個人逼埋喺一張四人檯，逼到無辦法彎身食，要拎起嚟食先可以食到！喺呢個時刻真係食龍肉都無味！我們叫咗鮮茄薯仔湯底豬扒蛋通粉嘅湯底味道唔係好濃郁，通粉亦唔係好彈牙！沙嗲牛肉出前一丁嘅味道比較鹹，牛肉亦唔係好嫩滑！芝麻牛肉汁牛冧肉撈丁嘅牛冧肉嘅肉質比較韌，個醬汁本來係芝麻牛肉汁，但出到嚟竟然變咗黑椒汁！真係令人極之失望嘅一餐！