夜晚6點開始有個匠人料理一人前，個set好豐富，我同朋友兩個人叫呢個set再加兩個小食就夠飽。
匠人料理一人前
⭐燒鱈魚片、吞拿魚蓉米通、枝豆
燒鱈魚片類似食開嘅魷魚絲，幾鮮甜。吞拿魚蓉新鮮，放上米通上面一齊食幾特別。
⭐刺身（三文魚、伊佐木、赤海蝦）
刺身新鮮，每一啖都好有鮮味，而每款都有兩片。
⭐壽司（油甘魚赤醋壽司、松葉蟹肉赤醋壽司、伊佐木赤醋壽司）
壽司幾精緻，油甘魚、松葉蟹肉同伊佐木各具特色，赤醋令壽司飯同魚生好夾。
⭐天婦羅沙鎚魚
呢個天婦羅沙鎚魚夠特別，炸得好脆，入面魚肉仲好鮮嫩。另外仲有南瓜同茄子天婦羅。
⭐海膽蛋白蒸
呢個係蒸蛋白，所以冇平時食開嘅茶碗蒸咁滑，不過海膽幾甜，冇怪味。
⭐燒安格斯牛配燒飯糰
安格斯牛肉口感好正，牛味濃郁，肉嫩多汁。飯糰燒到啱啱好，令外面金黃色，食落仲辣辣地，幾過癮。
⭐日式雪糕
上枱先知係紅豆宇治抹茶雪糕配小丸子，啱哂我心水，小丸子仲好軟糯，好味！
⭐日本蘋果梳打
呢個set除咗蘋果梳打，仲可以揀獺祭（150ml)，適合鍾意飲日本酒嘅人。
小食
⭐陶板清酒煮蜆
職員喺我哋面前煮蜆，見住啲蜆開，所以保證新鮮，食落好有酒香味，而個清酒湯更加係必飲。
⭐鐵板牛舌
呢碟黑椒洋蔥牛舌夠多洋蔥，食落好香，牛舌唔韌，亦醃得夠入味。
1
呢間餐廳整體樣樣野都唔差，個匠人料理一人前夠哂抵食，值得試下！
