御鐵

Open Now

Now Closed

經過咗聖誕節咁多唔同嘅派對之後，我終於有機會同老公出街二人世界，食餐好嘅。我哋去話咗銅鑼灣嘅御鉄撐枱腳。前菜係火雞青木瓜絲沙律，火雞肉鮮嫩可口，青木瓜非常爽脆鮮甜，其他嘅沙律菜都好新鮮，配合埋芥末醋真係一流。鮑魚則足足有成隻手掌咁大，師傅喺魚缸即夾即燒，輕輕鐵板1分鐘，就放上鐵架收水再用牛油白酒煎香，入口食出海水帶嚟嘅鹹香，點埋海草忌廉汁都幾夾味。來自馬來西亞嘅巴馬賴尿蝦，蝦肉爽彈鮮甜，無論蝦頭或是蝦腳，師傅都已經預先剪殼，方便易食，肉質飽滿。豬扒係鐵板嘅過程已經切咗片，係上碟後，餐廳用咗櫻桃木來做一個煙燻效果，配上嘅竹炭鹽，Wasabi同蒜片，可以比到我哋唔同嘅食法，感覺。豬扒油而不膩，爽口彈牙，肥瘦適中。清酒煮蜆湯，廚師喺鐵板上邊親自煮，絕對唔係喺湯湖裏面盛載出嚟。每碗都配有三大隻蜆肉，湯頭清甜。跟餐嘅和牛蛋包飯，份量驚人。加入左蔥花、紅蘿蔔粒、和牛肉碎，炒得金黃有鑊氣。蛋包飯用上蝦膏醬汁，食落份外美味。雪糕當日有三隻味道比客人選擇，分別係黑糖、紫薯同柚子，我當然叫左我最喜歡吃嘅紫薯口味啦。