郭仔記粥麵專家

Open Now

Now Closed

久仰大名而慕名而來！好久之前路過試左辣魚蛋非常有質數，其後係朋友口中得知車仔麵都有一手，今晚專程微服出巡一探虛實。首次探訪完全唔知食咩，求其點幾個試試。好多人，唯有坐中間長枱啦，感覺有點似油麻地通達噃。原來除左車仔麵仲有大量菜色，彷似茶餐廳 menu，芝士撈丁、西式快餐雞牛豬扒、港式即食麵、餐腿蛋、炒粉麵、等等，都幾雜喎。豬紅牛腩魚蛋鴛鴦配咖哩汁，都係我一貫作風河粉撈幼麵，鴛鴦考功夫！一定要先煮麵後煮河，否則河粉溶到碎濕濕或幼麵硬到索索聲！依碗滿意，粉滑麵彈，good！咖哩汁太少喇，唔該多汁，thank you。全雞蛋幼麵，味道雖淡，但掛上特辣香濃咖哩汁非常刺激美味，額頭冒出少少汗水。車仔麵牛腩依舊大路碎上，麻麻地。豬紅味鮮帶滑，燴得味濃，好食。魚蛋高質結實，嚥嚥韌韌，滿意。白魚蛋肥牛雞中翼鴛鴦配咖哩汁，白魚蛋好爽口，味濃但偏咸。肥牛太熟喎，鞋韌而且牛味淡。雞中翼浸太耐肉霉又乾爭爭。粉麵捲上大量沙嗲汁衝入口，香甜味美，麵爽彈、河棉滑，無得彈。