松記糖水店

Open Now

Now Closed

近呢一年西環好似開多咗新嘅糖水舖，所以都比較少食松記。不過呢晚路過又有啲口痕，所以就入去食咗個糖水。我哋叫咗兩個糖水，分別係椰皇飄香同埋雜果芋圓仙草凍。椰皇飄香係燉椰皇，入面有湯圓，芋圓，海底椰同西米。椰皇飄香可以揀凍或者熱，我見涼涼地就揀咗熱。個湯圓皮係綠茶，本身以為係紅豆或者黑芝麻餡，但一咬開竟然係奶黃餡，個人就覺得個味唔係好夾。松記用開嘅芋圓唔算係QQ嘅口感，係比較粉團同實淨，所以鍾唔鍾意就真係見仁見智，不過佢嘅芋圓係食到地瓜香。海底野就燉到好淋好滑，椰皇肉都可以好輕易咁刮出嚟不過比較可惜係個糖水唔係好重嘅椰子味，食到尾有啲淡口。雜果芋圓仙草凍，不過不失，仙草凍好食，不過我就麻麻哋有紅豆，可能紅豆太甜，食完紅豆再食仙草或者生果就會好似冇味咁。