唐述位於中環IFC，係一間高檔中式Fusion餐廳。呢間餐廳位置一流，寬闊嘅維多利亞海景配埋莊嚴宏大嘅中式裝修，整個氣氛優雅得嚟又唔失親切，真係好啱約會或者慶祝特別場合。佢哋嘅世味人生套餐集創意同傳統於一身，每道菜都係視覺同味覺嘅雙重享受。
甜椒醬蟶子皇
蟶子皇鮮甜爽口，配埋微酸微甜嘅甜椒醬，味道層次分明，開胃又唔會搶走蟶子嘅鮮味。
前菜三弄(百香梅茄、三絲海蜇、20年古越龍山花雕浸鮮蝦)
茄子煮到嫩滑，百香果嘅酸甜味同茄子嘅清香融合得啱啱好；海蜇清爽彈牙，口感非常清新；蝦浸滿花雕酒香，肉質鮮甜彈牙，酒味濃郁但唔會蓋過蝦嘅鮮味。
杏汁肆菓燉螺頭湯
呢碗湯絕對係老火湯嘅代表作，湯底用杏汁同四種瓜菓燉足時間，飲落去好香濃，螺頭鮮甜，有種滋潤嘅感覺，最岩慢慢品味。
蟬衣玉帶
煎到金黃嘅帶子外層香脆，內裡鮮嫩，仲有香芋絲增添咗口感層次，配埋少少醬汁，點到即止，令人回味無窮。
珍寶珠 (番石榴沙冰配桃膠)
番石榴沙冰清新解膩，桃膠嘅滑嫩口感令整個甜品更加有層次，係完美嘅中場甜點。
海苔蔥燒銀鱈魚
銀鱈魚用海苔包住，再炸到香脆，內裡脂肪豐富，入口即化，加上京蔥，令魚味更加突出。
荷香子薑欖豉醬蒸雞
雞肉嫩滑，荷葉香氣撲鼻，醬汁帶有子薑嘅清香同欖豉嘅鹹香，每一啖都好惹味。
魚香手功寬麵
寬麵係手工製作，煙韌彈牙，配埋魚香茄子嘅濃郁醬汁，酸甜微辣嘅味道簡直係一絕。
香芒雪燕烏豆花
烏豆花滑到好似牛奶布甸咁，加埋香甜嘅芒果同雪燕，清甜中帶豆香，為整餐畫上完美句號。
餐酒
Louis Latour 嘅搭配都非常出色，完美襯托每道菜嘅風味。
