頭盤中最有驚喜係辣味蟹肉撻，撻底鬆脆有牛油香，入面蟹肉帶微微麻辣，加上融化芝士，味道層次幾豐富。男友唔食蟹，所以我一個人食晒兩件（笑）。其他幾款頭盤比較清新，包括香芒牛油果蝦沙律同吞拿魚Ceviche，調味偏輕，適合夏天食
有兩款湯選擇。鮮茄海鮮湯略為煮得濃縮，味道偏鹹，但入面有大帶子、青口同大蜆，海鮮好足料。相對之下，龍蝦湯（+$10）味道順滑，有龍蝦肉，我就鍾意海鮮湯多啲
主菜揀咗波士頓龍蝦西班牙Paella（+$40）同炭燒美國Prime肉眼扒（+$50）。熱辣辣上枱，龍蝦肉質正常發揮，但蝦膏真係幾香，軟硬膏都有。肉眼扒厚度偏薄，熟度掌握得好，口感都尚算正常
甜品係芝士蛋糕，簡簡單單作個結尾
菜式風格以西式fusion為主，有幾款菜式做得幾用心。尤其係蟹肉撻同海鮮湯，個人覺得可一試。餐單設計多選擇，適合想嘆一餐唔太heavy又有啲變化嘅朋友。同埋餐廳幾適合傾偈
