餐廳裝潢 懷舊有Vintage感覺，店小整潔有點擠擁。店員態度良好，點餐送餐服務秩秩有序。眼見顧客車水馬龍，翻枱率高甚有效率！
餐廳主力做豬扒飯，有3款招牌口味 -蔥油、秘製肉燥、秘製咖哩，每款都係$50-60。呢個價喺中環基本上都好難搵到！
秘製豬扒飯 (肉燥汁) 58
招牌飯餐 神級豬扒好似隻手板咁大塊，差不多遮住個碗，外皮鬆脆粉薄，炸得乾身唔油膩，肉質嫩滑Juicy。
肉燥滷蛋飯 54
呢度嘅肉燥係用切碎豬肉粒，肥瘦適中 特別有口感。醬汁用甜醬油混製，鹹中帶甜，非常惹味撈飯一流。
椒鹽魷魚鬚 38
必食推介！ 採用魷魚鬚 酥炸香脆，椒鹽惹味香口，有濃烈嘅海味魷魚乾味，應該係經過風乾吸收曬水份，才用高溫油炸，魷魚鬚味道非常突出！
