小火焰韓式咖啡廳 (金山樓) (Closed)

小火焰韓式咖啡廳今日天氣開始轉凍，又落住毛毛雨。咁啱去大圍買完野比貓貓，咁就去揾啲野食暖下肚。去到馬會附近，見到呢間小火焰韓式咖啡廳，即刻諗返起之前去韓國旅行食即炸雞！咁我地二話不說就入咗去。餐廳都算幾大，但由於防疫限制，枱與枱之間加咗膠板，令座位睇落冇咁寬敞。餐廳提供好多唔同既韓式食品，炸雞，炒年糕，水冷麵，石頭鍋飯等等。除此之外，仲有一樣特別既野食，淮山麵！ 咁所以我地叫咗以下兩樣野食。芝味炸雞(半份)半份炸雞有四大件。有兩件雞槌，一件雞翼同埋一件雞上脾。炸雞表面滲滿咗芝士粉同擠咗好多芝士醬。芝士粉有好濃郁既芝士香味，而芝士醬係調味方面係偏甜既。炸雞表皮好脆身，但厚粉咗少少，所以細食既朋友可能食一件就會飽飽地。而肉質方面都算幾滑，咬落有少少肉汁，唔錯。鮮茄牛肋肉淮山面本身以為淮山面會係偏煙韌既，但食落去原來係好爽口既。而且食到最後都唔會吸得太多水，唔會漲晒同淋晒。而蕃茄湯底味道好濃郁，鐘意蕃茄既人應該會好滿足。牛肋肉好入味，但嫌有少少碎咗啲。整體唔錯。