咁橋呢日出開旺角做嘢,決定上去呢度試下啦！上到去見到佢有幾好折扣優惠，好似7:30前埋單走人同9:30後入座有85折等等，咁啱我哋就8:45左右上到去，梗係等多陣啦～
好喇，9點半就入到去，見到佢有本簿，入面全部都係啲Order紙，有好多好多款，大概都係壽司呀、刺身呀、炸物呀、小食呀、天婦羅呀、鍋物同鐵板燒咁上下啦，都唔記得哂
跟住同大少一張張揀揀揀，但最緊要梗係唔好眼闊肚窄啦，每樣都係叫一份，唔會嘥吖嘛！
第一樣到嘅係大少出去Order嘅煎蛋卷，真係好食噃！可能係即叫即整啦，熱辣辣好好味！
好快啲刺身就到喇，我哋叫咗三文魚、帶子同甜蝦。除咗三文魚無乜味之外，帶子同甜蝦都唔錯呀！
呢個薄切牛，入面包住啲蔥，幾香，不過就嫌佢唔夠稔喇！
我哋係食肉獸，再嚟一個一口牛，佢係鐵板煎，唔錯呀！
1
之後就叫咗個清酒煮蜆，本來都幾大期望㗎，可惜唔係好夠味，有少少失望呀！
呢間放題都幾有創意，有好幾款創意壽司，我就只係揀咗其中一款－桂花啫喱芒果蝦壽司。都幾驚喜喎！桂花香味加酸酸甜甜嘅芒果，配蝦壽司竟然完全唔覺得怪之餘，仲覺得幾好味，幾清新！
1
再嚟就一連兩款鐵板食物，帶子同蝦。鐵板蝦好香幾惹味，帶子都OK，不過就無蝦咁好味喇！
1
我係好鍾意蝦，所以都再叫咗呢個黑松露牡丹蝦壽司。黑松露太多，撥走一半後剛剛好，好好味！
去到天婦羅喇，我都係叫咗蝦啦～但唔知係咪我哋放涼咗，稔咗同埋蝦唔係好夠味啊～
仲食咗好多炸物同鍋物，但因為電話無電就無影相喇～ 食飽飽，就到甜品時間，雖然呢度價錢相宜，但係絕對唔係用平嘢啊！
雪糕係movenpick，每人一杯！
我最最最鍾意係呢度嘅飲品，有好多好多款揀，有韓國飲品，普通汽水，啤酒，本地一啲清熱飲品。我覺得真係好落本呀，我同大少傳人都飲咗兩款呀！好LIKE！
我都係耐唔中先去食放題，呢度唔算最好食果間，但以呢個價錢（$238八五折）真係好抵食！！我同大少都話如果下次夜咗唔知食咩都會再過嚟呀，因為佢仲要收成1點半呢～
