龍逸軒

Open Now

Now Closed

我從來冇喺OpenRice寫過任何食評，但我覺得今次唔寫真係對唔住自己。今日同朋友即興想食點心放題，於是係網上面搵一啲介紹點心放題嘅文章，好多間已經full Booking，唯一呢間龍逸軒仲有得book位，所以喳喳林去食，點知就出晒事。同我個標題一樣，總括而言就係「不可一不可再」。完全係不知所謂，自己去唐記包點買一定好食過佢好好好好好多。或者好似之前有一個食評講過自己返屋企整淘大點心仲好。先講環境，九龍酒店咁耐歷史都唔expect入邊有咩裝修，但一入去環境感覺上都尚可以。首先黎嘅燒賣蝦餃其實係正常，但唔會覺得特別好食。但之後在嚟嘅炸物、蒸點、甜品完全唔得。牛肉球可以完全冇味、素鵝得「油益」味、叉燒係凍上、燻蹄啲肉好似變壞左咁、最經典嘅係蟹肉菜苗餃，懷疑佢用罐頭蟹肉做，完全冇味。值得一提嘅係佢所有嘅點心除咗蒸點係蒸籠之外，其他係全部用酒樓嗰啲骨碟上台，其實感覺都真係幾差，我相信酒樓，甚至茶餐廳都唔會咁樣上菜。其實我真係唔明點解佢有本事收人三百幾蚊一位，如果大家完全唔在乎質素的話可以一試，當買個寶貴經驗/教訓/話題 都可以。如果真係想食放題，建議可以去稻x自製一個放題都唔使咁貴兼好食過佢。