上海弄堂菜肉餛飩 (Closed)

今日同朋友去銅鑼灣附近搵嘢食，喺鵝頸橋附近行道去天樂裡，見到一間裝修唔錯嘅中國餐館，就有去試下。 見到餐牌上有好多唔同嘅套餐，但分量對我哋嚟講有啲多，所以我哋就散叫幾碟餸，我哋叫咗一籠小籠包，上海湯年糕，上湯雲吞8隻同埋排骨菜飯。 過咗五分鐘上海湯年糕首先送上，個湯好鮮甜，入邊有幾款唔同嘅菜同菇，湯年糕係長條厚身狀，啲年糕吸咗個湯嘅鮮味。 跟住八隻上湯雲吞都送上，每粒雲吞都好大粒，入邊係菜肉嘅雲吞餡，啲肉好新鮮啲菜都好爽口，同雲吞皮幾薄幾滑。 過咗一陣，排骨菜飯亦都送上，排骨好大塊佢，分咗做5大舊。排骨好厚身，雖然排骨係炸過嚟但佢冇落任何炸粉，入口冇熱氣嘅感覺，排骨肉好結實，口感唔錯。 最後係小籠包，小籠包肉汁好多，個汁好鮮甜，入面啲肉都好新鮮，味道唔錯。