高麗軒韓國料理 (Closed)

「高麗軒，我細細個就聽佢個名啦。」高麗軒喺尖沙咀已經開業多年，讀中學嗰陣阿媽已經帶過我去食，到大學由於近，所以都間唔中同同學去食。今晚出開尖沙咀，想食韓燒就諗起高麗軒啦。餐廳門面唔算大唔搶眼，附近人流唔算多，雖然仲係疫情時期，但平日夜晚都差不多滿座㗎，想食最好book定位。平日夜晚兩位放題每人$248，任飲任食90分鐘，如果4人以上仲可以食120分鐘，幾公道。我哋仲加$68升級食多幾款。飲品自己出去攞，除咗汽水亦有特色韓國飲料。落單就睇menu寫number俾服務員就得。雖然方法傳統啲但啲食物都好快嚟，亦冇漏單，讚！星級推介美食六款，必叫嘅有【加拿大Prime雪花牛】，睇啲雪花紋就知係靚嘢，油脂豐富好香口。【帆立貝】大大粒、【帶子】鮮爽，一定要叫多啲回本。就算唔升級，普通餐牌嘅食材一樣高質，基本豬牛肉一定有啦，但唔升級都有海鮮，【鮮魷】、【海虎蝦】、【青口】等又係回本之選。 除咗韓燒食材，仲有好多湯類、飯類、一品料理選擇。【人蔘雞湯】同【牛肋骨湯】，去韓國餐廳食至少都$50一鍋，呢度任叫但質素依然，我哋掃咗好多鍋，冇「食力」去試其他。下次叫多啲戰友share食就啱晒。