港猿燒味 (Closed)

一樂大埔店摺埋之後，新界東已經無咩燒味店可以引到我去食 (我住新界西)，咁聽到話聯和墟有新野，即試。今日買左 鵝髀雞髀飯，叉燒例牌。先講個鵝，食鵝注重肉質多過脆皮，呢道既鵝肉肥瘦十分適中，有好濃既煙薰味 (佢主打煙薰)，咬落去夠鬆軟，皮因為我外賣番屋企食，唔脆就預左，而個皮又燒到鬼咁靚，掂。如果一樂有 10 分，港猿我比 9 分。叉燒略為鹹左少少 (我食得偏淡)，燶邊好香口，肉偏瘦，肉質就略為唔夠淋，咬到尾有少少柴，如果新桂香係 10 分既話，齒留香、天天會係 9 分，港猿我比 7.5 分。切雞有驚起，咬落好軟滑，我係甚少係燒味店叫雞既，想食雞我會去隔離街食海南雞飯，但呢道既雞，比坊間大部份燒味店掂。白飯算 ok, 煮得淋左少少 (亦可能係汁多左 d)。價錢無咩可批評，真係好抵食。餐具用左環保 d 既紙盒，like。聽聞燒腩係佢拿手，一定會再嚟食。