銅鑼灣呢間餐廳幾就腳，睇相幾OK，唔諗了！
依度成棟大廈都係食野，搭lift上落，好彩時間尚早，都唔洗點等。
坐低無耐，有個外籍嘅妹妹幫我哋落餐，佢好努力咁用廣東話同我哋講解；上餐之後又問我哋使唔使要胡椒、要唔要多兩個碟 ……
笑容親切，態度我比100分！
mcmug 瞄一瞄部八達通收錢機：「侍應用英文+餐牌用英文+高級啲嘅扒房又用八達通俾錢，咁都俾我搵到😎」
燒美國安格斯西冷牛扒 配黑松露薯蓉 12oz
牛扒睇個樣就知道好食，我哋叫七成熟，牛肉質地軟淋淋，輕輕一切就切開咗。喺鐵架上面烤過嘅牛肉係特別香，好有肉味，旁邊有細細塊肥肉黐住啲筋，怕肥嘅我都忍唔住食咗一啖，牛油香味喺口中擴散，沒有肥膩感，又邪惡又滿足。黑松露薯蓉，分量比較少、幾啖就俾我哋食晒了。
羊架唔係燒嘅係煎嘅，麥兜覺都是牛肉較好，但我就好鍾意，因為羊架冇騷味，薯條係連皮嘅粗薯幾好食。
Tropical Punch
我哋見人哋飲又試吓先，因為個樣真係好靚好吸引。上面嗰塊焦糖餅好似魷魚遊戲入邊嗰塊咁，原來係咁甜，過關唔係咁易。
Mcmug後記：一分錢一分貨，真係好好食；但認真諗，價錢真係唔係好貴，$318食一個咁有質素嘅牛扒，真係抵俾！自問係屋企真係整唔到個種炭燒味，希望下次紀念日快啲到，同埋希望消費卷再加碼😗
