Video
Read full review
2011-09-23
41 views
2011年嘅長龍店之一，豈能不試呢今晚一個人，特意走去碰碰運氣。八點半，眼見門口，仍然有不少客人等位走到柜面攞張”飛仔”，非常好彩地，只需要等四張一人枱。但係其他客人 (多數係兩人)，就要等多幾十張枱，一個人經常都可以快d，哈哈等咗約15分鐘，就輪到我啦未入去之前，四周打量，發現係右手邊，係一張bar枱，擺放咗幾張高bar櫈，好奇地問吓，點解咁多人等位，都唔招呼客人呢？原來佢哋話嗰邊係bar area，只可以飲嘢或小食，唔可以食麵，所以客人繼續等，座位就繼續空，日本人果然係有佢哋嘅執著同堅持係左手邊嘅牆身，係一幅碗牆，上面掛滿唔同顏色同圖案嘅碗，當然，主打嘅，都係佢哋嘅招牌顏色，白色與紅色，係右上角仲有幾隻黑色，非常搶眼今晚被安排坐係廚房前面嘅bar枱，係最正嘅位置，一來可以睇到師傅嘅功夫，二來又可以第一時間食，正其實，以拉麵館來說，一風堂的確闊落，雖然坐係長長嘅bar枱上，但係一d都唔迫，非常鬆動，絕對冇因為人多而加位，又係日本人另一個執著同堅持，值得學習一坐低，又係白色與紅色，一個紅色嘅匙羹扥，上面放著一隻白色嘅匙羹，再加上一本紅色嘅餐牌同一張白色嘅紙巾，非常搶眼、觸目，亦都非常貼
今晚一個人，特意走去碰碰運氣。八點半，眼見門口，仍然有不少客人等位走到柜面攞張”飛仔”，非常好彩地，只需要等四張一人枱。但係其他客人 (多數係兩人)，就要等多幾十張枱，一個人經常都可以快d，哈哈
等咗約15分鐘，就輪到我啦
未入去之前，四周打量，發現係右手邊，係一張bar枱，擺放咗幾張高bar櫈，好奇地問吓，點解咁多人等位，都唔招呼客人呢？原來佢哋話嗰邊係bar area，只可以飲嘢或小食，唔可以食麵，所以客人繼續等，座位就繼續空，日本人果然係有佢哋嘅執著同堅持係左手邊嘅牆身，係一幅碗牆，上面掛滿唔同顏色同圖案嘅碗，當然，主打嘅，都係佢哋嘅招牌顏色，白色與紅色，係右上角仲有幾隻黑色，非常搶眼
今晚被安排坐係廚房前面嘅bar枱，係最正嘅位置，一來可以睇到師傅嘅功夫，二來又可以第一時間食，正
其實，以拉麵館來說，一風堂的確闊落，雖然坐係長長嘅bar枱上，但係一d都唔迫，非常鬆動，絕對冇因為人多而加位，又係日本人另一個執著同堅持，值得學習一坐低，又係白色與紅色，一個紅色嘅匙羹扥，上面放著一隻白色嘅匙羹，再加上一本紅色嘅餐牌同一張白色嘅紙巾，非常搶眼、觸目，亦都非常貼題。
來一風堂，緊係要食拉麵，除咗”赤丸新味”同”白丸原味”，仲有”一風堂辣肉味噌”；顧名思義，辣肉味噌當然係辣；白丸原味，係一風堂嘅傳統味道；赤丸新味則係改良版，味道比白丸原味濃，因為加咗佢哋秘製嘅味噌；另外，仲可以加紫菜、青蔥、半熟蛋、义燒、豬頸肉同豚角煮，不過每加一樣都要另外加錢，價錢由$8至$25不等。
因為我唔喜歡辣，所以我叫咗個赤丸新味，嗰服務員好有禮貌地問我要軟d，還是硬d，因為我比較喜歡爽身，唔太腍，所以就要硬d；跟著就加嗰煎餃子和炙燒牛肉他他；餃子都有兩個選擇，一種係”一風堂餃子”，就係我叫這種煎餃子，另一種係”日式炸餃子”，呢種做法係將d餃子炸熟，唔係煎；我就比較喜歡傳統嘅煎餃子，所以就叫咗一風堂餃子。嗰服務員仲好細心咁問我，想上什麼菜先，既然我都係一個人，冇所謂啦，就叫一齊上，我諗我都可以招架得著，哈哈首先來的，係煎餃子，一碟五隻，連同餃子汁同辣油一併奉上，好五隻餃子好整齊咁放係一隻鐵板上，size偏細，一口一隻的話，剛剛好；餃子上面，放咗d蔥花同薑茸，我就二話不說，將d蔥花同薑茸夾落隻碟仔到，再加d餃子汁，準備開餐；一夾上手，已經感覺到皮簿，係好簿，但唔知是否驚皮太簿，易爆，所以餡都唔多，正因為餡少，反而唔覺油膩，肉汁唔算多，但鮮甜，尚可接受，但煎得唔夠香口，唔夠焦
跟著，就上拉麵啦，係赤丸新味，我冇加任何配料，碗內有兩塊义燒，黑木耳，少量銀芽，蔥花，當然唔少得佢哋嘅秘製嘅味噌、黑醬油同蒜粒，至於筍、粟米、牛油都係冇嘅。
湯底係豬骨湯底，呈奶白偏黃色，上面有一層好簿嘅油，唔多，係應有嘅份量；先將味噌、黑醬油撈均，湯底即時變橙紅色，香味亦隨之散發出來，係一種濃烈嘅醬油加蒜頭味，反而聞唔到豬骨嘅味道；呷了一啖湯，果然濃郁，首先嚐到嘅亦都係醬油和蒜頭味，雖然眼見份量唔多，但已十分足夠，除此之外，亦都嚐到肉味，不過嚐唔到鮮味與否，因為被醬油和蒜頭味所蓋過；質地滑身，唔太膠，易入口；正想喝多口之際，慢著……喉嚨內好似有一種微熱嘅感覺，原來嗰湯底有d微辣，的確係”微”辣，因為當你入口之際，係完全感覺唔到辣味，當你嚥下後，嗰種”微”辣嘅感覺，就會慢慢咁散發出來，有趣，值得欣賞嚐過湯後，當然係麵啦，麵條係幼麵，直身，唔係攣攣嗰種；我揀咗比較硬身，入口，的確唔腍，有咬感，但係唔爽，唔夠彈牙，去日本，冇食過一風堂，未知與香港是否一樣，但今日就覺得有d失望。
至於嗰兩塊义燒，係半肥瘦，我個人比較喜歡瘦，但今日反而覺得呢兩件半肥瘦，肥得恰到好處坦白講，香味唔足夠，但係就好滑，唔嚡，冇渣，近乎入口即溶嘅感覺，如果冇足夠嘅肥肉，係做唔到呢種效果，今日嘅半肥瘦，真係肥瘦均勻，肥而不膩，可惜只得兩塊，唔夠喉
最後，就係炙燒牛肉他他，一個大沙律碗，放滿冰粒，上面用葉同檸檬扥著九片生牛肉，醬料有一”球”wasabi混蘿蔔茸 (放係匙羹上)，中間淺色嘅係柚子胡椒汁和左手邊深色嘅紫蘇梅子汁，好靚，但係點解”他他”唔係切碎，係一片片嘅？算啦，冇再深究。先試吓d醬料，D蘿蔔茸的確混咗d wasabi入去，但份量唔多，少少嗆鼻；柚子胡椒汁，少少酸，冇胡椒味；紫蘇梅子汁，比柚子胡椒汁酸，味道亦比較強，幾醒胃；我就將d蘿蔔茸分別放入柚子汁同梅子汁，撈混，準備醮牛肉。
牛肉唔係好大片，外面係燒熟咗少少，不過唔焦；入面係生嘅，但雪花唔多，唔夠肥脂；厚薄適中，太厚，會太韌，難嚼，太簿，又冇咬感；第一件，冇醮任何醬料，肉味唔夠，冇鮮嫩嘅感覺，但唔韌，以$78一碟嘅價錢，又豈會食到和牛呢？第二件，醮了柚子胡椒汁，少少酸味，不過都是淡淡的；第三件，醮了紫蘇梅子汁，酸味比柚子汁濃，甚至蓋過牛肉味，反正牛肉味都唔濃，當牛肉沙律食啦，反而幾醒胃；唔駛五分鐘，九片牛肉已經歸入我肚裡。
食完，仲有半碗湯，雖然比較濃，但都頗吸引，幾惹味，所以一口氣喝光了，才結賬走人，但的確比較鹹，半個鐘後，返到屋企，仲有d口渴Post
