原來牛霸王係一間新開嘅日本漢堡餐廳，招牌嘅手打漢堡飯絕對係必嗌嘅菜式！
📍招牌手打和牛漢堡蘭王蛋飯 （$128）
秘製漢堡汁｜酸瓜
咬落去嘅漢堡口感肉質非常之軟糯，而漢堡汁同埋酸瓜蓉亦夾得好好食，微酸嘅酸瓜蓉被打碎後更香，亦都為充滿牛味嘅漢堡扒解膩。不得不提嘅喺上面橙黃色嘅蘭王雞蛋，戳破後流出嚟嘅蛋汁唔單止有豐富嘅蛋香，亦為漢堡再添一個層次🤤
📍手打芝士安格斯漢堡蘭王蛋飯（$118）
日本泡菜｜白味噌汁
因為係安格斯嘅關係，漢堡扒嘅口感本身就比較煙韌，推介平時鍾意食安格斯牛肉嘅大家去試！🥩日本泡菜同韓國泡菜原來都幾唔同，感覺上上冇咁辣而係比較酸，而漢堡扒入面有芝士但芝士味唔算重，反而同白味噌嘅忌廉汁更帶出奶香味，同上面個款係口味都幾分明！
🍚伴飯係日本嘅珍珠米，米質彈牙煙韌，連平時少食飯嘅我都忍唔住食多幾啖🤭 如果想食少啲碳水嘅，都有沙律可以揀㗎！🥗
飲品亦都唔算貴，加$15有我鍾意嘅橙汁！😆👍🏻
食完呢餐飯都幾滿足，下次嚟觀塘可以再試下其他嘢！
推介指數：4.4/5⭐️
