Yadllie Plate 야들리애플래이트 (兆萬中心)

本身見呢間係OpenRice有千幾個like應該好正，都擺左落收藏想去試好耐架啦。今次真係book左去試下，睇個menu見d野食價錢都唔平，諗住真係卑貴d試下高質/大份嘅韓國菜/炸雞啦。去到見個場都幾熱鬧嘅，心諗應該冇死啦。好啦，嗰日兩人叫左一個 ［夏威夷阿努哈 Aloha Platter］嘅炸物拼盤，有炸雞4件、炸蝦6舊、炸洋蔥圈5件、粟米1舊。先唔講d數量先啦，炸雞乾如木柴，又細件又冇味；炸蝦望落好大隻好正咁啊，一食落去成啖都係炸粉，d粉厚到佔左成六成；洋蔥圈，如果炸洋蔥圈都衰真係執左間鋪算啦；粟米，$218你竟然夠膽死卑一舊粟米？仲要冇味係齋燒粟米？之後仲有個韓國進口［白切五花腩］$288。睇個價同女朋友係度擔心會唔會食唔晒呢，成三百蚊肉喎。黎到，O晒嘴，得嗰十隻手指數得晒嘅五花腩，仲要得幾塊係厚切，其他係薄切？先唔討論蒸五花腩有幾柒，舊五花腩食落去唔算香，夾埋d生菜、醬汁、蔥食落口講真冇乜特別，完全諗唔明點解要收咁貴？如果想送飯要加多$15先有。我地坐係度睇下其他人食成點啦，走嘅人真係冇一個係笑住走架。你唔係高質/大碟就唔好收咁貴嘅價錢啦，根本搵笨。