麻辣風雲 (荃碧大廈) (Closed)

今日到荃灣做嘢，去到海壩街，發現到一間應該開了數月的店 (印象中之前喺食雞煲)。加上天氣開始涼涼地想食吓辣嘢，一於試下去。餐廳位於一樓要步行上一層，見到內部都好新，亦好光猛入座後見到所有食客都係叫午市火鍋，攪到我都想試一試黑色menu 係散叫餸菜，而特色紅menu 係飲品。見午市火鍋有3樣選擇，而打邊爐無海鮮同牛肉又唔成事，最後揀了珍寶海鮮一人鍋($68)，仲可以自選兩款配料。而薯粉係無限添加跟火鍋加$18 可配特飲，就點了一埕洛神花茶。職員送上台一刻我都嚇了一跳，做乜改送了”女兒紅”原來只係用女兒紅埕，都好有特色，而洛神花茶亦相當提神。鍋底上枱後打開已聞到陣陣酸菜味好豐富嘅午餐配料揀了墨魚丸同牛肉餅。墨魚丸無特別，反而牛肉餅夠彈牙，咬落有肉汁，值得推介。海鮮方面，味道鮮甜，夠新鮮已無得輸。其實加埋薯粉落去就變成「酸菜海鮮薯粉」。額外追加了特級和牛($88)，雪花都均衡，食落有口感，有牛味。特色鍋底粥(加$15)，點餐紙背後教你點煮，有得食，有得玩終於完成啦，酸菜鍋底好適合煮成粥，食落十分鮮甜。整體來說，午市火鍋有驚喜，環境舒適，食物有質素，會一試再試，下次有機會約埋朋友一齊試晚餐。