飲茶 (Closed)

朋友話要去飲茶，咁未試過晚飯飲茶，所以就去啦。尖沙咀店幾大下，裝修好雅緻，啲燈光好光猛，成個感覺好新式好舒服，完全無舊式酒樓咁焗促。呢度啲點心名字十分搞鬼，令人會心微笑。我地揀左睇住流奶，其實係奶黃包黎。上枱熱辣辣，一咬開雖未至於爆漿，但都好香奶黃味。又點左個飯，叫近朱者赤，炒飯炒得乾身粒粒分明，加入左紅菜頭汁炒，變成紅色。又加入左菜遠粒係啲飯入面同埋雞肉粒，其實好有口感，味道都幾好。叫左籠雀仔，用雀籠咁上枱，雖然啲雀仔樣子有啲歪歪地，但都好可愛，入面係蓮蓉，層酥皮雖然有啲厚，但造型100分，好趣緻得意。最後叫左個玫瑰白糖糕，上面灑左玫瑰花瓣，雖然玫瑰花味唔算濃，但唔太甜，好軟綿綿。呢度環境好好，裝修又靚，食開西式想轉轉口味去飲茶，呢度係唔錯選擇。