茜廊餐廳 (Tin Shing Shopping Centre)

Open Now

Now Closed

放假同爸爸媽媽落樓下食下午茶，呢間餐廳開左好多年，我都食左好多年🙈平時都係食晚餐多，今日試下下午茶~超抵食，睇餐牌下午茶一般都係40$左右，唔預佢會好大份，而且應該都好輕食，下午茶跟埋餐飲。一出菜嚇親我，雞比薯條好大件，雞比炸得好透，好脆，本身有醃製過所以唔會無味，薯條亦都剛炸好，好脆好香，爸爸平時唔食快餐呢啲嘢，佢都忍唔住睇多次餐牌。爸爸食咗個雞肉飯，份量都比預期大，感覺似晚餐份量。雞肉有好多件，咖喱汁好食，唔會太辣，薯仔同蕃正常發揮，整體都唔錯。媽媽食咗個意大利飯，好好食所以我搶食左好多，香濃南瓜味，入面都有啲帶子(剪碎左)，好抵食。

雖然店名係Cafe，但似係一間茶餐廳feel 嘅西餐廳😅。位處屋邨商場，走大眾化路線，勝在街坊價，下午茶去到6:00，仲有幾十個餐任你揀。上星期嚟呢度食咗一次下午茶，送咗張小食券（只限星期一至五下午茶堂食使用），今次就乘機用咗佢。小食券送嘅係吉列炸蝦併西多士，原價$39免咗，但要收原價嘅加一服務費，即係$3.9。雖然係送嘅，但都唔hea喎，實物個賣相同coupon張相九成九相似，新鮮炸起，好脆，又唔會油淋淋咁，味道都好正常。唯一美中不足係西多士無餡（無花生醬夾心），所以略嫌乾。因為已經有送嘅小食，所以唔揀粉麵飯嗰d咁勁嘅下午茶餐，叫咗個相對「輕量」嘅焗墨西哥肉醬薯皮。焗薯皮有三件，醬料都豐富，整體份量同造型都ok。落order時我無為意墨西哥醬係辣嘅，我只係可以食到少少辣，呢個醬我尚可以接受，食得晒份薯皮，但一邊食一邊流鼻水囉😅餐飲即磨咖啡，就係一般平民西餐廳咖啡機沖嘅水準，正正常常。咁豐富嘅下午茶，連加一盛惠$40.2，味道同份量都唔差，呢個價錢，算係好抵。註：埋單時，又獲贈兩張優惠券，下次可以用😄

星期四1300去餐廳lunch, 不用排隊就直接入內因為餐廳的學生餐好抵食，包餐飲，又不用加一記得叫餐生餐時要出示學生證俾職員看學生餐-B餐-三色芝士白汁焗魚柳飯 $40味道方面：相當不錯上面有滿滿的芝士，魚柳都好足份量，有4條放滿整個碟面，不過因為有好多芝士好快就飽了我食淨4分1的飯不過我同事叫正價的餐就不抵食了，1個餐有$50-60幾都有，再加1就要$70左右先埋到單

早餐諗唔到食咩，求其去左屋企附近既西餐廳茜廊，入到去人唔多，環境幾大所以都坐得舒服既，揀左個 $43 烤雞肉，煎農場雙蛋配羅宋湯煙斗粉，牛角包。羅宋湯酸酸地係幾開胃，但雞肉超鞋，煙斗粉都好少，真係食幾啖食完，似飲湯多過食粉。仲有佢既牛角包係縮水版，勁細舊之餘再成舊淋哂真心一啖已經幾乎咬哂。唯一成功既應該係煎雙蛋，唔太咸可以入到口，橙汁就正常橙汁一杯對呢度既早餐真係唔可以有期望，今次大失望，又貴又唔好食冇下次

諗住隨便食過午餐，見茜廊都比較多位，就入去食過快飯。 之前去開德福嗰間，諗住天水圍呢間都差不多，怎料，截然不同，一進入內，同茶餐廳沒有分別，只是有播放音樂，但與餐廳的格局倒也有點格格不入，加上，衞生一般，有些客人的舉止也相當嚇人😖餐牌都有很多選擇，我倆就點了：🍝芝士卡邦尼蜆肉：份量算大，味道不錯🍛燴闊條麵鴛鴦焗飯（白汁龍利柳拼茄汁焗煙鴨胸）：份量尚算可以，鴨胸切到好似腸仔，不是一片片，魚柳都算大塊，味道也不錯午餐配以忌廉湯🥣、蒜蓉包🧄🥖及飲品🥤，典型的套餐，都算不俗。

呢間西餐廳啲野都唔錯。上次食咗個龍蝦汁意粉系其貌不揚但龍蝦味超香😍😍。今次試呢個忌廉明太子煙斗粉都幾滑嘟嘟唔會好霉。不過啲汁就無乜明太子味。So far啲蝦都幾爽口大隻。下次可能堂食會好啲，等外賣等咗超耐😅😅。

中伏了! 週日午餐，食物和環境差勁。背景音樂差，勁播快歌，好似打仗咁。出菜慢， 樣樣都要催。叫了一份葡汁牛脷飯， 牛脷只得幾粒，主要食葡汁撈飯，葡汁傑撻撻 ，非常恐怖， 食咗半碟就 支持唔住，逼住要倒。裝修， 座位開始殘舊。下次寧願挨餓都唔嚟食。一定唔會再嚟。

間舖頭本身開喺屋企附近，因為之前食都唔算太難食，有時經過都會幫襯。今日見都幾多人，就入咗去食。入到去嘅時候就叫咗一份鐵板西冷牛扒，佢就話可以揀生熟程度嘅，咁因為佢係鐵板上，我就唔想佢太韌就揀咗三成熟，屋企人就叫咗燒春雞同埋黑椒牛扒飯。大概等咗15至20分鐘，終於上主菜。但係嘢飲同埋湯未到，嗰陣時就提咗佢上埋。一上個主菜就即刻切開塊牛扒，一睇佢根本就係七成熟！食落去又好韌，一啲肉汁都冇！係勁乾，勁難食！然之後都提咗佢三至四次嘢飲同埋湯未到，直到就嚟食完個主菜佢先上湯，見到都嚇咗一跳，我以為係正常忌廉湯，點知個湯係忌廉洋蔥火腿湯！食主菜同埋飲湯期間都有再提佢上嘢飲，直到食完主菜飲完湯，嘢飲都依然未上。咁就提多佢兩次話嘢飲未上，而嗰個人都係記得嘅。雖然我覺得多人漏單都叫可以接受，但係實在太離譜，都已經叫咗佢六至七次由主菜嚟到嘅時候已經開始提到食完所有嘢。雖然價錢唔算貴，但係食物質素同漏單情況十分嚴重！越食越嬲，一句講晒冇下次！

打電話去外賣自取早餐：羅宋湯：好香濃，不過湯有一片紅油浮面，先隔走D油，再倒粉入湯。湯內真材實料，有菜、胡蘿蔔....粉：好健康，由於湯和粉分開裝，所以粉保持原味，唔會浸到爛曬！牛角包🥐：好好味，夠鬆脆，不過好邪惡（充滿牛油味）太陽蛋、德國腸：一般，食得入口！已經幫襯數次，質素無退步亦無進步，保持以往水準，希望有優惠推出啦！份量十足，女士食唔曬，因為太飽，食唔落個包和腸子！午餐都唔會餓！而男士就一定夠飽！聽電話的侍應態度一般，我講完個餐內容（牛角包、腸子、太陽蛋，羅宋湯粉），佢仲反問我：係米即係C3餐？ 我答：我點知你地餐廳叫呢個係咩餐？我已經講曬要咩啦？佢答：即係C3餐.......🙄🙄🙄🙄🙄🙄

用OpenRice App 訂購外賣自取，逢星期二有Master Card 優惠，買滿45元減15元，幫襯過好多次早餐，食過早晨全餐、經典風味、烏冬、米粉、出前一丁都試過。早晨全餐嘅多士，又乾又硬不敢恭維，希望堂食會好好多。經典風味早餐，如果係三餸，我基本上只食呢三樣餸，雞扒一片（Size大約係手掌心咁大），味道不錯不斷encore，紐倫堡腸兩條，煎雙蛋，如果冇特別要求佢一定係比太陽蛋。加配吉列豬扒$12 ，做得都唔錯，外脆，但係肉質比較實，沙律醬就水坑坑，味道好，但係唔好睇，返到公司一Pat野咁。唯獨有啲不好嘅係粉麵，茜廊係除了出前一丁會分湯外，銀絲米粉及加$3食烏冬，都係不會分湯的，主動要求分湯要另外加兩蚊，返到來一滴湯都冇，我根本都懷疑佢有冇加到湯，而家好似譚仔三哥、吉野家、鴻仔記... 有汁有湯嘅食物都已經用晒有隔盒，我有向茜廊提出過建議，但係好明顯不被接納。老老實實如果唔係OpenRice有優惠，如果冇咗呢個優惠，我相信用正價去光顧嘅機會率好微好微真心

茜朗西餐廳至開業以黎一直係小妹居住附近既至愛無論由環境、服務至食物都做得唔錯一日之計在於晨，今日小妹黎到食個醒神早餐🥣雞扒蕃茄漏斗通粉 呢個通粉既湯底係蕃茄牛尾湯，蕃茄味好香濃，絕對唔係罐頭湯，味道又唔太酸，配埋漏斗形既通粉簡直啖啖都食到湯汁精華雞扒肉質唔會煮得太老，依然保持鮮嫩跟餐煎雙蛋+牛角包🥐呢度既太陽蛋水準一直都保持穩定，蛋黃keep到5成熟，小妹最愛刺穿蛋黃放落通粉度食，正呀！牛角包味道微咸，夠鬆軟食完呢個早餐我即刻精神爽利滿分💯

黃咖喱薯仔雞肉飯 HKD 38 （連餐飲）黃咖哩有點辣，薯仔綿綿的，雞肉也嫩嫩的，雖然預了下午茶的份量會少一點，但真的少的有點誇張——只有兩小塊，比一口雞大丁點兒，圖中左上方十一點方向是其中一塊，而薯仔的份量是非常充足龍蝦汁蜆肉意大利粉 HKD 48 （連餐飲）龍蝦汁不太夠，後加了黑椒，味道剛剛好，蜆肉普通，份量尚可白酒煮藍青口 HKD 38雖然白酒的味道是很淡很淡的，但是味道是不錯的，值得讚賞的是，每個殻中都有藍青口，加上湯中有甜爽可口的洋蔥粒，性價比很高雖是下午茶時間，但餐廳裏座無虛席，而很多人都點了下午茶餐買一送一的西冷牛扒，所以下次下午茶來要點西冷牛扒或來吃正餐，心理上會平衡一點

疫情擴散下，我哋都選擇外賣多過出街食，呢間茜朗都有搞外賣優惠（85折），而且OpenRice 都搞信用卡優惠（$45-$15）真係好吸引。不過點餐就出現問題，午餐跟餐有飲品同湯，OpenRice 頁面冇得揀湯，又冇得揀飲品嘅冰的多寡，而甜度，餐廳會俾糖漿就唔洗揀。最後餐廳都係要打黎問我地飲咩湯，真係無奈。用咗我媽媽的新Acc買，有$30優惠！Openrice 嘅袋嘅質料比起其他外賣好，係比較硬身嘅膠袋！雖然話要30分鐘，其實十零分鐘就攞得，唔好太遲先去攞呀！蒜蓉包好脆但好硬，因為外賣好快就凍咗。乾炒豬柳河粉（$49）都炒得唔錯，但油咗啲啲。咖喱雞球飯（$49）好食😋！ 份量多，咖喱濃，雞滑！香煎雞扒拼豬柳配薯菜（$68）呢份比較失望，份量少，雞扒還不錯，滑嫩，但豬柳好乾，薯菜都好少，唔飽肚......飲品係俾糖漿，唔洗揀甜度。仲有湯飲，但比較稀，冇料......外賣Menu

兩大一BB去完屏山玩兒童遊樂室，就去再就近天盛揾食，見到有間西餐廳，地方夠大又有BB椅就選擇左叫左一份二人餐，先有湯就一般西餐廳紅白湯，夠味道合格，沙津就有睇頭，芒果新鮮無出水，黑醋亦好足，主食叫左西冷牛扒同埋香燒雞白汁飯，西冷牛扒夠多汁不過有筋，但我地覺得ok, 飯就完全比想像中大份好多，好抵食，夠2-3人食，雞亦多汁夠香，水準之上，另外叫左白酒青口，因為朋友餵緊人奶，叫左一定要煮沸同埋唔好咁多酒，出黎效果可以，最後餐既甜品係蛋糕，都係一般，但賣相可以唔馬虎，套餐$248,性價比高

今日第一次黎到sidewalk食佢個西式早餐，我叫左個雞扒黑松露炒蛋多士餐。多士好夠脆，加埋黑松露一齊食無得頂：雞扒就好軟身，唔會好鞋。呢到既西式早餐唔錯，會再試埋其他餐！