上海廳1930 (Renamed) View

返工放飯 经理請食飯 嚟咗呢一間總共10幾個人 分開兩張枱 好似聽講送咗幾杯豆漿 期間坐低落單嘅時候 剩係得一本餐牌 其他人坐晒喺度等 其他人睇完 …要叫先識做 比多兩本餐牌 明明見到佢嗰陣時淨係企埋一邊 冇嘢做緊 跟住唔知點解杯茶入面有條青瓜喺度 😒叫佢換過杯 都唔知 發生咩事咁樣😅我叫咗個炸醬麵 好耐之前細個嘅時候食個炸醬麵好似係辣嘅 但係呢一個好似係肉碎麵多啲 唔知個炸醬去咗邊🤣 配咗個好油嘅手抓餅價錢幾抵 食到食唔晒之前嚟過呢度食 推薦酒釀丸子👍🏻👍🏻👍🏻✨

疫情關係，近期在家工作，終於有機會可以落嚟試吓個午市，飲咗佢杯茶，都幾清香嘅。叫咗午市麵餐，一嚟到就發現原隻曱甴喺擔擔面裏面。即時打卡同向一個男經理表示要求換。另外加錢叫咗個水晶肴肉做小食，啲啫喱入口即溶，都幾好食嘅。換咗個午市飯餐黎到，就係個老火湯裏面發現有原隻烏蠅。唔知係我咁好彩，連續中獎，定其實啲昆蟲係材料之一呢？已經冇晒胃口。但冷靜落嚟，再打下卡先！唯有再叫個男經理，再指一指個蟲仔，個經理話唔使我俾錢，幫我取消個餐，比我走。(所以我講左句多謝！)明白工作辛苦，但係疫情嘅情況下，希望餐飲嘅衛生可以做得更加好。但其實就算唔喺疫情嚴重嘅情況下，有昆蟲本身就已經係嚴重問題吧？特登嚟寫低個食評，而家個人醒晒，飯後可以更加集中精神工作。

聽講呢間嘢嘅前身係上海婆婆， 我就唔知係咪啦，我冇check到， 記憶中上海婆婆係好食嘅， 諗住呢間嘢應該都唔會太差🤣 我覺得四樣嘢嚟講， 黑醋排骨係最好食嘅， 呢間嘢應該好食喺小炒上面🤭 所以呢碟可以再試， 同埋都幾有鑊氣， 唔夠半碟已經喉嚨痛😂😂跟住就到紅油抄手， 真心覺得食過最難食嘅抄手之一， 唔辣之餘， 有啲甜甜地嘅豉油味， 一般般🤭講下佢個擔擔麵啦， 擔擔麵比較清少少， 不過都有少少擔擔麵嘅味道， 個面底唔會太差， 如果下午茶去食都抵😂最後講下佢嘅水晶肴肉， 唔知點解感覺似得個鹹豬手啲肉🤣 鹹鹹地， 中間透明嘅嘢就會入口溶化... 我自己冇特別興趣， 不過其他人話幾好食囉😂 咁應該見仁見智！

重陽節個排去咗拜山，之後同屋企人去咗呢度食上海菜。佢午餐係有套餐嘅，嗌一個set會有一個飯，一個餸，一個湯， 五十幾六十零蚊使加一。我哋四個人嗌咗四個餸，餸既分量唔算好多，味道都ok嘅。蒜芯炒小黃牛，牛肉好明顯係加過嘢令到佢好嫩滑嘅，而且非常重嘅孜然味，係比較野味嘅。糖醋魚塊既魚塊唔多，但係味道係好食嘅。跟住仲嗌咗一個上海津白同獅子球，獅子球唔記得咗影相就食咗。獅子頭一碟有兩舊， 如果一人自己食呢個set就可能嗰餐唔係好夠嘢食xp 但佢獅子球嘅味道比較軟身，味道都ok嘅。整體覺得係不過不失啦！

星期五悶悶地約咗個朋友喺黃大仙食飯平時夜晚少食澱粉 不過朋友今日話想食上海野 就即管陪佢試吓呢間上海廳店內裝修都有懷舊上海feel 坐得都幾舒服首先嚟嘅係兩個冷盤～四川怪味雞同埋皮蛋豆腐 份量好足～ 之後當然唔少得就係上海小籠包同埋京蔥牛肉包 包點上嘅時候都係熱辣辣嘅 兩個都合格～ 夠熱多汁好食然後覺得叫多個粉面又會太飽 於是朋友提議食桂花蜜汁火方 係佢最鍾意嘅上海菜 我自己就第一次試 呢個我覺得係最好食嘅 有甜甜蜜蜜嘅金華火腿 加上脆卜卜嘅腐竹片同埋青瓜 再夾喺熱辣辣嘅夾包入邊 食落去口感豐富！雖然要$108 不過我覺得物有所值👍🏾埋單每人$200有找 唔錯！

三人行過喱間上海店門口，發覺裝修都有d特色。門口呢個擺設都有d東方色彩。入面都算寬敞，有圓枱亦有卡位，適合不同人數進餐。下午茶時段，當然要睇吓有乜可以選擇啦。發覺配搭都有好多款，重有凍豆漿送添。呢個擔擔麵，份量係小d，可能係下午茶掛。辣度適中，大部份人應該可以接受。配料都係大路野，睇相都會明晒，畧帶點花生醬味，ok嘅。紅豆沙包外面有d甩皮甩骨嘅感覺，d紅豆沙甜度算適中，衰在半凍唔熱，冇左剛剛蒸起嘅感覺，好食度大打折扣。 雪菜肉絲麵普通過普通，冇乜賣點，祇可以用清清地嚟形容。蒸銀絲卷又係半凍不熱，俾人有種唔新鮮嘅感覺，冇可能話好食囉。嫩雞燴麵不過不失，調味都可以接受嘅，唔會太咸。鷄就講唔上嫩囉。全部野都冇乜亮點，衹屬街坊食店水平。落單嗰位侍應不但笑容欠奉，重好唔耐煩嗰隻，要改進吓喇，記住我地係消費者嚟㗎，都係你個米飯班主。

都冇哂以前啲嘢食， 個炸銀絲卷又縮細咗，以前好多嘢食， 幾道菜都冇哂， 辣個菜都係叫個小辣，但真係辣咗少少。 豆沙鍋餅同香蕉豆沙都好味。小籠包好味又多汁。整體嚟講全部都唔錯。等位方面我8：00到一嚟就有位。800幾蚊6位都幾抵食。

食咗一半先發現碟泡椒牛肉有曱甴🤮，同店員講，淨係話咁cancel 呢碟，好似無事發生咁！道歉都冇，態度惡劣，最後仲要將冇來到既菜式計埋錢！ 結果只是冇計曱甴餸同免加一。千祈唔好去

今日到黃大仙中心購物，購物完順便食晚飯，今晚心目中想食中菜，看商場水牌介紹有上海菜，二話不說便決定了。點菜時職員介紹了3折精選小菜優惠，晚市惠顧滿$200便可以3折加配其中一款小菜，本想加配牛肋骨，但已售罄，於是便點了麥片芥末蝦球。蝦球新鮮彈牙，配上芥末沙律醬，很醒胃。其他食物味道也不錯 : 小籠包 $38火腿扒津白 $75上海粗炒 $72炸銀絲卷 $25本身不打算叫這麼多，全因為有折扣。最終是吃不下全部，要打包回家，哈!

糖醋魚塊$62魚塊好滑，大慨有5-6件，酸甜度剛好，配白飯吃麻婆豆腐$54⋯⋯點餐時，侍應細心地講，呢個餸係辣，不過可以揀「小」辣，果然唔太辣👍🏻酸辣湯麵$68，普普通通，唔覺得好食；又唔辣套餐可配小籠包，正常好食小菜包一碗白飯+例湯，湯好甜，飲完見到大量青紅蘿蔔🥕，切到好細粒，啱老人家食；不過佢俾小左碗湯給我😿裝修雅致午市套餐抵食👍🏻一份套餐免加一服務費及茶費，都好公道座位舒適，下次可試其他菜式

服務態度惡劣，店員踩筷子🙃完全唔想招呼客人既樣。食物質素極差：水晶肉十分硬，仲加麻油？！芥末蝦球中間舊粉未炸好，粉皮厚薄不一，似係兩款粉皮，蟹粉豆腐勁多蟹殼，銀絲卷入面散哂🤦🏻‍♂️難怪無咩人食

黃金四季豆第一次食意外地係最好食個款，最後靠依個送飯😂松子魚幾失望～個汁唔酸（唔係唔夠酸而係無酸味）😂😂好少可會食到零酸味，個魚無咩味，原本最期待係依碟😂結果打包返去都食唔哂，因為真係無味，個魚本身已經唔鮮甜蟹粉豆腐諗住好送飯啦，無蟹味都算仲要腥腥地😂好伏依碟野，返屋企加醋後都係搞唔掂😂😂9點先入座所以9點半先到齊開始食，得半個鐘食唔哂，全部要打包😂想講個四季豆翻叮後都係咁好食👍👍其他就……哈哈

今日黎到黃大仙中心既上海廳1930，裝修復古中國風，地方面積都幾大，安排我地坐既座位都幾寬敞，環境不錯，餐廳主要食上海菜，不過點心、海鮮、冷盤、小菜都可以點麻醬拌粉皮 8/10主要有粉皮、雞絲和青瓜絲，淋上麻醬及灑上少量白芝麻，麻醬幾香，粉皮煮得煙煙靭靭同埋幾滑，不錯前菜👍🏻蟹粉扒豆苗 8.5/10上菜時已經聞到好香味道，香氣撲鼻，豆苗炒得好好，唔油同埋仲係好嫩，仲要有蟹膏同蟹肉☺️相當足料皮蛋豆腐 7.5/10豆腐份量都唔少，清涼嫩滑，上面加左大量肉鬆，惹味有嚼口，同時又帶少少咸香，皮蛋少少糖心 食落軟綿🤤上海炒年糕 8.5/10好耐冇食過咁煙韌既年糕，可以同韓式年糕媲美，醬油帶甜，每片年糕都沾滿醬油顏色，一口接一口咁食😋上海小籠包7/10 小籠包好普遍，但整得好食相當難，呢到小籠包外表唔錯，厚薄適中，能承托包內湯汁，尖端位置有少少厚，肉餡鮮甜有咬口，肉汁唔太油膩，加埋薑絲的豉油，錦上添花☺️松子黃花魚 7/10非常考驗師傅刀工同功架既一道菜，起完魚骨再切花紋，再將魚身炸香淋上糖醋汁，黃花魚肉肥厚，不過有少少老，但味道酸甜香脆，幾開胃

我真係極度驚恐，一向都有買開佢個外賣，次次都係食酸辣湯拉麵，咁外賣湯同麵係分開嘅！咁我將個酸辣湯飲咗d之後，就準備將個麵倒埋落去食，點知一開蓋就發現麵入面有d啡色嘅嘢，立刻覺得唔對路，用筷子夾開少少麵發現竟然係隻曱甴，見到咁真係就嚟暈低！我有相為証！我真係以後都唔會再幫襯佢！真係人都癲！

屋企生日飯最鍾意呢啲間， 因為老一輩唔鍾意食西餐同日本嘢， 上海嘢較啱佢哋口味。首先環境舒適好闊落， 一家大細坐都會好舒服， 嚟餸速度都好快， 重點係泊車易 假日黎都唔使點排車場味道同價錢衡量的話， 我覺得性價比好高， 價錢較平民化，環境又坐得得適服。值得推介係佢個醬油炒飯，味夠濃飯夠分明非常好食， 但係如果唔食得重口味嘅會覺得佢偏鹹，其他小菜中規中矩 ， 喺九龍區想搵間性價比嘅上海嘢比較困難， 因為大集團坐得舒服價錢較貴， 如果價錢平又要幫襯老小店， 相對一家人坐就冇咁舒服， 所以總體嚟講性價比算幾高， 值得推薦