荷華庭園景餐廳 (Changed Hand) New Restaurant

第2次嚟呢度啦，呢度簡直個感覺唔似香港。好似去咗旅行咁。好似歐洲嘅小花園。❤️❤️😊😊今日好晒，入到去之後職員就帶咗我去室內。對上一次嚟仲凍凍地我就揀咗坐室外，仲可以望住條河，我記得上次睇住個風景食午餐好chill😆第一次入到黎佢嘅室內，外面咁熱入到黎有好強嘅冷氣沖過嚟🤣正！同埋佢室內嘅佈置都幾靚👍🏻今次叫咗香煎紐西蘭羊鞍（$268）呢間餐廳最特別嘅就係唔係淨係食環境，連嘢食嘅質素都好高。羊鞍燒到好香，香草味好重。食落去羊一啲蘇味都冇。好厚實，無煎到完全熟晒，就咁切落去啲汁都係咁流出嚟😋😋😋👍🏻👍🏻我遲啲就會帶老公嚟試埋佢嘅晚餐😃

返到嚟大埔都一段時間啦😌聽大埔嘅朋友介紹林村呢度有間餐廳就好似城市中嘅秘密花園咁💐佈置得好靚 好似個小型迪士尼咁🍄同埋佢話食物質素都好高👍🏻今日難得放假晏晝我就自己去試吓佢一入到去佢歐式風格仲有條河跟住職員行過條橋之後就到我嘅飯桌啦我就叫咗鵝肝醬焗豬扒飯😻😻好特別嘅醬汁 一般都係蕃茄醬嘅咋嘛都未食咋聞到浸浸鵝肝味道 好濃烈😍😍😍我落去豬扒 又口又多汁👍🏻👍🏻😍啖啖肉 豬扒加埋個鵝肝醬再撈落啲飯到食真係好好味😋 👍🏻睇住咁靚嘅風景自己一個人靜靜地咁食美食 好似去咗一人旅行咁。

一月頭結婚紀念，想找一間坐得疏落舒適的餐廳慶祝；見到呢度環境ok, 本身又未去過林村，就諗住試下呢間，順道行下林村。因餐廳注明有車位提供，原以為好快會搵到位泊車，但入到林村口開始非常塞，經常有對頭車要幾架車一齊駛向後讓車出...到餐廳門口附近發現已沒有車位，要等位，等待其間又要經常駛開讓村內既車出；結果用咗半個鐘；比book位時間遲咗幾個字先入到餐廳...好彩餐廳亦有留位比我地，職員帶我哋去咗戶外位置，枱與枱之間隔得幾遠，周圍環境十分優美-我哋叫左兩個set lunch坦白講，味道麻麻，個意粉好淡口...隨餐送既紅豆糕亦一般(無影相), 食咗一淡就冇食..不過勝在價錢唔貴，環境寧靜優美，服務亦ok, 都抵番既~

好耐冇嚟過不過真係呢一次失望一次侍應唔用筆抄低啲嘢其實唔緊要但係要記得囉唔好問完一次又一次個餐湯只有一半其實另一半係咪俾人飲咗一路食一路好多烏蠅其實真係好唔衛生食物真係好一半兩個人食兩個餐六百幾其實真係一啲都唔平要搵侍應嘅要自己行入去廚房搵佢哋只會企喺度吹水

設有户外嘅餐廳，出面仲有椰子樹同埋唔同嘅涼亭主題，環境一流！德國鹹豬手Price：$298(單點)📌平時嘅鹹豬手有lunch set但由於新年假期去所以要單嗌。呢間嘅德國鹹豬手已經拆埋骨，唔洗自己處理，值得加分👍🏻外面有啲鹹豬手會好鹹，但呢個味道唔鹹，仲食到燒過嘅味道，唔會蓋過哂豬手原來嘅味道🤩肉嫩皮厚，有啲位置層皮仲燒到脆卜卜👍🏻酥皮焗龍蝦湯Price：$98📌平時飲開忌廉湯好漏，龍蝦湯比較fresh。呢個係佢主打嘅湯，擺上枱係真係好熱，酥皮就不過不失，入面幾足料，有大大舊嘅龍蝦肉🦞黑松露汁鵝肝醬煙鴨胸燴意粉Price：$128📌意粉有待改善😕用黑松露同鵝肝醬去整個汁，但完全食唔出有任何黑松露同鵝肝嘅味道，反而有種豬潤味，唔知道係唔係呢兩種唔適合擺埋一齊😪唯一好少少嘅係鴨胸份量好多又大件，但味道真係要再改善喇😓

餐廳室外位置(有靚位置打卡)前菜火腿拼蜜瓜沙律豬肋骨配薯蓉$168豬肋骨燒得好香口(肉質鮮嫩)銀雪魚扒配忌廉汁$198銀雪魚煎得香脆，肉質鮮甜甜品椰汁红豆糕好香椰汁味，好多红豆(偏甜)

環境設施殘舊，好似去左國內食團餐嘅餐廳。坐室外座熱到頭暈，仲要俾熱水你飲。亦有很多蚊蟲陪你進食。食物價錢很貴但質素很有改善空間。龍蝦係雪藏貨，毫無鮮味，意粉好似白烚咁，無汁無味，連蒜片都搵唔到一片。海鮮忌廉湯似是罐頭湯開水。巴馬火腿好似食剩嘅餸頭餸尾咁得幾細片。三文魚竟然上厚粉去炸，油淋淋咁。服務一般，所有服務都很慢，包括帶位、上菜，拎餐具餐巾甚至埋單等左十分鐘都無影，要我親自去櫃檯埋單。總言之食完得個吉。

本來都抱住一個食環境嘅心情黎，但食物真係好失望，咁嘅食物質素仲要除返每位差唔多$500真係的確唔低。。。最後我地食物未到齊，仲有個阿姐要收我地啲碟，我只係話佢知我地食物未到齊佢同我講：我地收10:00 wor(嗰陣9:30)我話：我知。。。你都要比我地食埋，我地至多食快啲。。。佢就好串咁話：咁你地真係食快啲。。。大佬~而家係你地啲嘢未出，唔係我地慢慢食，你急住收工不如吹下廚房啦～

Food was overpriced, the taste was okay but wasn’t worth the price. Not much meat from the ribs and a bit overcooked. The portion of the sea bass was also little. The environment was quite good and the staff were friendly. Being here once is already enough since you can definitely get better food out there in this price range

餐廳景致有室內座及戶外座亭台樓閣花蟲鳥語beautiful!右手邊係藍蝶花荔枝檸檬椰果特飲荔枝好香個樣無敵靚唔錯左手邊係藍蝶花杏仁特飲粉藍色都靚呀但朋友話杏仁味薄咗d否則完美前菜朋友要名物"蜜瓜配巴馬火腿"我果個係酸醋汁煙三文魚沙律朋友個蜜瓜配巴馬火腿蜜瓜有簡過熟透,夠香甜咁先配襯到咸香的巴馬火腿我果個酸醋汁煙三文魚沙律都唔弱酸醋汁調得好好無臭醋味酸酸地正好中和三文魚的肥膩卷埋沙律菜一齊入口酸、爽、肥美、清新、滿足、集於一身兩大塊,絕不孤寒廚師有精心研究配搭朋友的主菜燒羊扒配白飯煎得超級靚未食已經贏跟三款汁磨菇汁、芥辣汁同薄荷o者喱我少食羊試味交比朋友佢給出三個字『100分』我果個係煎黑豚肉配手工薯蓉我從未食過咁好食的豬扒!!!超有肉味唔韌,一切即斷但又無鬆肉粉梳打粉味係貨真價實的黑豚肉。薯蓉手工壓出嚟仲有一粒粒薯仔肉就係咁先有質感但稍為可惜的是略欠飽足感視覺上無我朋友碟羊扒咁有充實感但係我都比滿分飯後甜品係椰汁紅豆糕美味美味全程連加一$660我覺得值得

話說，上一次去食嘅時候冇鹹豬手食，已經有啲唔開心，今日特登早啲去，終於可以試到佢嘅鹹豬手。佢嘅鹹豬手好出色，而且仲要係拆埋骨，細心嘅廚師，確實值得一讚。鹹豬手嘅味道，對比我之前喺英國實習嘅時候，味道可以話係差唔多，充滿德國嘅風味，唯一不足嘅地方就係冇鹹菜伴碟。不過，呢啲都係個人喜好姐哈哈！再講返佢嘅鹹豬手，豬嘅香味好濃郁，尤其是喺骨附近嘅肉更加令到人食指大動。肉嘅質地亦都唔會太靱，咬落去啱啱好。另外，今次亦都試咗佢嘅龍蝦意粉，龍蝦方面，佢係成隻上，美感方面可以話係滿分，同埋佢嘅龍蝦肉亦都有埋龍蝦嘅膏，在撈埋落啲意粉度食可以話係超級無敵勁好食。最後，亦都要講下佢嘅番茄肉碎湯，呢個湯可能我見識少，之前都未飲過。但係，今次飲落去反而超級好飲，因為肉嘅香味同蕃茄嘅酸味撈埋一齊係非常之好食，亦都令到口感更加提升。所以話呢間餐廳從來都冇令到我失望過，食物嘅質素永遠都有保證，而且無敵嘅景觀，所有環境加埋服務都值得攞滿分嘅一間餐廳。

過去星期六同友人一齊去行山，十一點由粉嶺出發，再行到林村，時間剛好下午三點三。到林村見到呢間餐廳，有戶外同室內座位，好似好relax咁，我地都行到好攰，就決定坐底飲杯野同食少少小食。當日有lunch menu提供，主要係扒類，但行完山又想食light d, 於是叫左個大蝦沙律。餐廳用左新鮮生果，需要唔係好甜，但就好解渴。大蝦相信唔係新鮮貨，但都幾爽口，無梅口，醬汁我覺得比較甜，如果多醬會似食甜品，好彩醬汁份量適中。

星期日瞓醒，唔知食乜好，太太提議呢間餐廳，好，雖然遠咗少少，都一於同太太試下。入到村交通都幾繁忙，避車倒車讓路，前後都搞咗一二十分鐘先泊好車。我地選擇在室外用餐，環境十分舒適，員工有善有熱誠，值得一讚。點了2份午餐，揀咗鵝肝焗豬扒飯，西冷午扒。頭盤有湯/沙律。。。都係果d啦，但係個蕃茄湯加肉碎再配脆脆蒜蓉多士又幾特別喎 ，個煙三文魚沙律都幾好。到主菜，第一個先嚟報到的係我好祈望的鵝肝焗豬，香，好香，即試。。。第一啖。。。噢。。。好羶，覺得唔太夾，試多啖。。。又好似易接受dd😅，講翻個豬扒及個飯底真心唔差，可以做正常的蕃茄或咖喱焗豬會好好多，純熟個人意見😅好，另一主菜牛扒上枱，賣相一般但好香，立即試，脆邊有少少焦香，正，如果多少少牛味就perfect，但以兩舊零的價錢嚟講整算是好食。餐茶我要奶茶，老婆要咖啡。奶茶唔我最like的港式，用咗錫蘭茶?唔識但又幾特別喎。咖啡都幾香。原來午餐set有跟甜品，椰汁紅豆糕。紅豆及甜品從來都不是我杯茶，但老婆好欣賞，所以都好食2份午餐差不多5舊水，講真唔平，仲要無雷公咁遠。如果有時間，想輕鬆過半日都係一個幾好的選擇。

呢間餐廳既元素，一定包含有：服務、食物質素、景觀等等各個因素。而呢一間餐廳，係我心目中所有都係滿分。首先如果你係坐喺室外嘅話佢個景觀係十分之開陽，對住一座又一座青翠嘅山，就算你有厭食症，相信對住個咁靚嘅景食飯一定即刻都會餓鬼上身。第二，服務員嘅質素亦都十分之高，因為佢嘅嗰日特別大風，店員亦都好主動咁問我哋需唔需要披肩，呢一樣野係令到我有驚喜。而且，每一次上餐之前都會幫我哋換餐具，試問有邊一間餐廳嘅服務可以去到咁嘅質素？最後梗係要講吓佢嘅食物質素啦，我哋嗰日食咗火焰雪山、鱈魚扒。首先佢嘅火焰雪山，雖然係點左小份量嘅火焰雪山，但係兩個人食都係食唔晒，因為份量10分充足，火焰雪山唔會太甜亦都唔會唔夠甜，甜味剛剛好。另外，佢嘅魚扒，亦都10分出色，充滿新鮮嘅魚味，絕對唔係冷藏魚，煎完出嚟嘅魚扒，亦都唔會太散，保持到魚肉嘅質感。

同老公慶祝生日，只係喺OpenRice 訂座時留言，估唔到職員配合得好好！又好有禮貌，幫手影相又影得好靚，成餐飯食得好開心。以前黎過幾次，食物keep 到水準，推介。