11 月嘅十強餐廳可以話係百家爭鳴，有香港人最愛嘅日本菜，亦有泰國菜、德國菜、意大利菜等；有街頭小食，亦有打卡 Cafe。當中有四間都位於銅鑼灣，睇嚟呢區真係飯局熱點呢～
第10位 御石燒（*新上榜）
圖: 今年年中開業、位於旺角嘅石板燒肉專門店。天氣涼涼哋，有得用自己用石板燒又有牛肉食，的確係唔錯嘅。最多人推介嘅係御燒極上級黑松露吉列牛，牛肉有一定厚度，加上外面混入黑松露嘅吉列皮，香口！
第9位 野川拉麵の深燒食堂
圖: Shanshan321
元朗呢間主打串燒嘅小店，星期一至日都開到凌晨 1:30，係真·深宵食堂～而且只要分享餐廳 Facebook Page 同留言，就即享指定炸物、燒物、壽司、爐端燒、刺身、飲品同生啤低至半價優惠，難怪唔少食評都話選擇多 CP 值又高。
第8位 SuperNormal 
圖: lanna tsang
位於九龍灣主打德國菜嘅酒吧餐廳，暌違三年再度上榜，大家讚不絕口嘅依然係佢哋嘅招牌柚子脆皮德國豬手，豬手用柚子麥啤浸泡八個鐘，皮脆肉嫩、食落仲帶淡淡柚子同麥香，配蜜糖芥末醬，送啤酒一流。白酒煮法國藍青口配蒜蓉包都值得一試。
第7位 10分麵包
圖: SumYu__NG
入秋都要繼續拉絲！葵廣呢間小食店連續兩個月上榜，繼續主打韓國 Oppa 主理嘅拉絲芝士包。睇住店員即叫即整，熱辣辣拎上手就可以準備搣開麵包，拉起長長嘅芝士絲。睇咁多食評嘅相就知道成功率幾高，而且芝士多得嚟又唔會太膩，所以咁多人繼續潮聖囉。
第6位 Cafe Zense（*新上榜）
圖: 銅鑼灣樓上西餐廳，室內裝修走黑白輕工業風，亦有露天座位，最重要枱同枱之間嘅空間唔會太窄，坐得舒服。食物以歐陸菜為主，亦有部分 Fusion 菜，例如泰式冬陰忌廉藍青口，飽滿鮮甜嘅藍青口加上酸酸辣辣嘅冬陰醬，惹味。甜品同飲品都有水準。
第5位 GARIGUETTE（*新上榜）
圖: 嚟自東京表參道、IG-able 嘅打卡美食 GARIGUETTE 拿破崙 9 月登陸銅鑼灣，唔知係咪 11 月嘅時候排隊人龍稍微縮短，吸引到更多人去試呢？概念嚟自法國傳統千層酥，改良成鏤空嘅圓形拿破崙。原味士多啤梨同香港限定奶茶忌廉芒果拿破崙都好多人試。
第4位 FAB Kitchen 
圖:香港人除咗去鬧區、亦會瓹窿瓹罅周圍搵「好西」，荔枝角呢間樓上西餐廳就係唔少心中嘅 Hidden Gem，價錢親民又食到擺盤精緻、用料上盛嘅西餐。紅酒燉紐西蘭草飼封門牛柳同烤紐西蘭草飼鹿柳都好受歡迎㗎。
第3位 就是偏偏喜歡你
圖: heidyowo
嚟到銅鑼灣呢間樓上 Cafe，絕對打卡才是正經事：粉紅色花牆加上大量乾花擺設，好似走入花花時間咁令人少女心爆發。而且佢哋嘅食物平均水準都唔錯，菠蘿照燒雞漢堡、香辣南美海蝦意粉、鮮大蝦龍蝦汁米意粉等都係推介，更有三層架下午茶供應！
第2位 Mano
圖: pigfoodiexhk
繼續係銅鑼灣樓上餐廳，不過呢間就主打意大利菜，包括手工意粉。最多人推介嘅係意式脆皮燒豬腩卷配辣肉腸蘭度豆，豬皮燒到脆卜卜，加埋少少肥膏同腍身嘅豬肉，口感層次好豐富。芝士控就要試香濃海鮮虎蝦三色芝士貝殼粉，醬汁芝士味好香濃。
第1位 Apinara
圖: 11 月榜首係金鐘呢間一直以嚟口碑都唔錯嘅泰國菜！餐廳主打正宗泰國菜，經典嘅冬蔭功、泰式椰汁雞湯、泰式和牛船麵等都好味。而且定價合理，Lunch Set包湯、自選主菜、沙律、甜品同嘢飲都係 $188 起，金鐘嚟講算抵食。
文：Cathy.H
