掃街係唔少香港人都好喜愛嘅動作。未夠鐘食飯又掃一掃，食飽飽又要掃一掃，總之，行喺條街度見到一間間嘅小食店就會忍唔住，乜都想食！至於掃街熱點，多到接近區區都有，一於逐區去睇下。好耐冇同大家周圍去啦，今次去油麻地啦。
喺九龍區掃街，可能通常第一時間都會諗起旺角，之但係行過少少嘅油麻地，其實都有唔少嘢食呀，而且又相對上少啲人，行得舒服，啲啲。
入味牛雜 廟街牛雜
圖：廟街可以話係油麻地地標，總係可以喺度搵到最地道、最香港味嘅嘢。好似呢檔牛雜咁，都好多年喇，豬大腸爽脆腍身，牛雜香濃入味，仲要有坊間好少再搵到嘅柚皮！大大件、爆晒汁，真係好有味道！麻甩？又如何？
碳燒串燒 廟街小食
圖：同一條街行過幾步就係呢間串燒店，話佢經典就係咁，呢度用碳燒㗎，好鬼香，行過都聞到，好自然唔肚餓都會被吸引咗埋去想食返兩三串。燒雞翼吖，全翼嚟，層皮燒到脆卜卜，仲有啲油啷下啷下，唔好理個肥字住啦，記得要加埋秘製沙嗲醬先至係perfect池。但唔好話唔提你，啲沙嗲醬唔嘢少㗎，就算係小辣都有返咁上下~~~
D24白雪餅 榴蓮王
圖：榴槤控直情嚟親油麻地都要食啦，呢間仲要地鐵站一出行幾步就到，太方便。望下個menu，選擇困難症即刻發作，由小食到甜品到飲品通通都係榴槤，仲要好多都係平時冇乜機會食到嘅，好似榴槤cheese cake呀榴槤卷呀咁。但quota有限都係要揀。D24白雪餅吖，外脆內軟，中間夾滿晒香噴噴（係呀，勁香）嘅榴槤肉，啖啖都好滿足。仲可以叫多杯榴槤奶昔，都係D24打成嘅，杰身，奶香中慢慢愈飲愈滲得多榴槤味出嚟。
四川小食 三合鍋魁
圖：鍋魁呢家嘢，香港未必太常見，係四川嘅街頭小食嚟，啱晒麻辣小子。外層嘅酥餅，先煎後烘，夠晒酥脆，餡餅內可以選擇夾住豬肉、牛肉、蔥油，食落仲會有啲麻辣嘅感覺。行個街都可以過一過辣癮，唔錯。
章魚小丸子 日船章魚小丸子
圖：曾幾何時，香港都興起過一陣章魚小丸子潮，不過，自從玉子燒呀、pancake呀、珍珠奶茶呀等等輪住上位之後，小丸子都企埋咗一邊喇。但係，耐唔耐總係會心血來潮想食返幾粒。油麻地好在仲有間舖喺度，一盒六粒，中間嘅八爪魚大大粒，又彈牙，面層嘅甜燒汁同沙律醬再加wasabi，加埋一齊就係種熟悉嘅味道。
梳乎厘班戟 am.pm
圖：認真，呢間水準有啲飄忽，之但係如果各位大大流連在油麻地又忽然梳乎厘pancake癮大發，呢間總算可以止一止癮。人龍唔少㗎都，最多人叫就係梳乎厘加3.7牛奶雪糕，好似可以一次過滿足兩個願望咁嘛。牛奶雪糕唔知點解係藍色嘅，但奶香唔錯，溶得快記住要食快啲。梳乎厘係幾鬆軟，好有空氣感但蛋味偏淡。另一個常見嘅吸睛品就係炎燒布丁梳乎厘，焦糖脆面簡直係成嚿嘅精髓嚟，加分唔少。
黑磚鮮奶 了不起
圖：食咗咁多嘢都口渴喇，買返杯嘢飲啦。唔好睇佢哋又係果茶、latte、黑糖珍珠嗰啲，有杯叫黑糖黑磚鮮奶，幾特別，主打嚟。黑磚即係佢哋自家製嘅焦糖啫喱，偏軟身，焦糖味香，甜度十足。杯奶有黑磚再加埋黑糖自然甜上加甜，但對於甜魔嚟講應該會好開心。
文：Kar