樂源車仔麵 (已結業)

響舊墟行咗冇耐,突然聞到陣陣食物嘅香味,哈哈…講出嚟真係笑死人,我哋兩公婆一向為食,竟然跟住果陣飄埋嚟嘅香味,去揾間食店。呵呵…轉個彎啫,就比我哋揾到。原來係車仔麵喎,唔理咁多喇,一於入去試下!除咗一般車仔麵餸豬紅、豬皮、蘿蔔之外,睇見貼響牆上嘅餐牌推介,有好多其他餸選擇,而且賣相同香味,都嚴重地令到我想每樣都試一試,搞到我都唔知揀咩餸好。因為老公鍾意食牛,所以我就幫佢揀咗一碗以牛為主嘅凈餸。包括有牛仔骨、牛腩、牛筋同蘿蔔。嘿嘿…而我就一口氣揀咗豬手、阿都寶排骨、豬腸、豬紅同埋冬菇,加一個凈粗麵另上,(我唔係孤寒呀,只係想留位食多幾個餸嘛!)未講啲嘢食好唔好味,先講佢哋個車仔麵湯底,因為好夠味,所以凈麵都好好味道!另外,如果你哋係好似我老公鍾意食辣嘅人,知道後一定會好開心,因為佢哋除咗有自己調味嘅沙嗲汁比客人揀之外,仲有一款秘製四川麻辣汁,香辣四射,味道一流。至於啲車仔麵餸,可以講係我試過咁多車仔麵中最高水準嘅一間!先講原汁牛腩,你點會估到可以響車仔麵食到牛腩舖水準嘅牛腩?而豬手同埋豬腸炆得又腍又入味,真係好正呀!